हामी सबैकाे संसारन्यूज

९ जेठ, काठमाण्डौं । साउदी अरबमा कोरोना संक्रमणबाट हालसम्म ७ नेपालीको मृत्यु भएको छ भने १,३६४ जना संक्रमित भएको नेपाली दूतावास साउदीले जानकारी दिएको छ ।

दूतावासका अनुसार राजधानी रियाद क्षेत्रमा २९९ जना, पूर्व क्षेत्रमा ६९५, कसिम क्षेत्रमा १९ जना अन्य क्षेत्रमा ३ गरी राजदूतावाले हेर्ने क्षेत्रमा १०१६ जना र जेद्दा क्षेत्र (जेद्दा १७६, मक्का ६५, मदिना ७२, जाजान क्षेत्रमा ३३ र ताबुकमा २ जना) मा ३४८ जना संक्रमित भएका छन् ।

संक्रमित मध्ये १७ जना महिला रहेका छन् भने संक्रमित मध्ये ७ जना (यस मध्ये ३ जना महावाणिज्यदूतावास जेद्दाको सूचनामा उल्लेख) नेपालीको निधन भएको पनि दूतावासले जानकारी दिएको छ ।

साउदी अधिकारीहरुका अनुसार संक्रमणबाट निको हुने नेपालीहरुको संख्या उत्साहजनक रहेको बताएको जानकारी दिँदै कोरोनाको संक्रमित व्यक्तिहरुसँग टेलिफोन सम्पर्क गर्दा सबैले उच्च मनोबल दिने र हौसला प्रदान गर्ने प्रकारका कुराकानी गरिदिन पनि दूतावासले अनुरोध गरेको छ । ‘उच्च मनोबलले रोगसँग लड्ने क्षमता वृद्धि गर्दछ ।’ दूतावासद्धारा जारी सूचनामा भनिएको छ ।

साउदी अरबको स्वास्थ्य मन्त्रालय र विदेश मन्त्रालयले दिएको लिखित जानकारी अनुसार साउदी अरबमा मार्च २, २०२० देखि आजसम्म ६५,०७७ जना संक्रमित भएका छन् । संक्रमितहरु मध्ये आधा भन्दा बढी निको भई फर्केका र मृत्यु दर पनि न्यून रहेको बताइएको छ ।