हामी सबैकाे संसारन्यूज

१३ जेठ, काठमाडौं । कोरोना भाइरस(कोभिड–१९) पोजेटिभ देखिएर आइसोलेसनमा रहेका एक गाउँपालिका अध्यक्षले आइसोलेसनको बसाईलाई उपलब्धिमुलक बनाउने बताएका छन् ।

प्रदेश नं ५ गुल्मी धुर्कोट गाउँपालिका अध्यक्ष रहेका भुपाल पोखरेलले एकान्तवासलाई अवसरको रुपमा लिँदै धुर्कोट गाउँपालिकाको समग्र योजना र समृद्ध धुर्कोटको खाका कोर्ने समयका रुपमा लिएको बताएका छन् ।

प्राकृतिक स्रोत सम्पदाको उचित प्रयोग तथा कृषि व्यवसायिकरणका लागि नीतिगत आधार तयार गर्दै आइरहेका भुपाल पोखरेलले आफूसँग जोडिएकाहरुले तत्काल चेक गर्न, क्वारेन्टाइनमा बस्न र अरु नागरिकले उत्पादन तथा कृषिका काम नियमित रुपमा गर्न अनुरोध समेत गरेका छन् ।

छिमेकी गाउँमा देखिएको एक संक्रमणका आधारमा जनप्रतिनिधि समेतको परीक्षण गर्दा आफूलाई कोभिड १९ ले छोएको तर आफू कत्ति पनि विचलित नभएको समेत बतव्यद्वारा जानकारी गराएका छन् ।