Sansar News
१९ जेठ, काठमाण्डौं । कर्णाली प्रदेशका मुख्यमन्त्री महेन्द्र बहादुर शाहीले बाँकेमा भएको सडक दुर्घटनाप्रति दुःख व्यक्त गरेका छन् ।
प्रदेश नम्बर ५ को बाँकेस्थित राप्ति सोनारी गाउँपालिकामा आइतबार राति भएको सडक दुर्घटनामा १२ जनाको मृत्यु र २१ जना घाइते भएकोमा मुख्यमन्त्री शाहीले दुःख व्यक्त गर्दै घाईतेहरुको स्वास्थ्यलाभको कामना गर्दै मृतकका परिवारजनमा समवेदना व्यक्त गरेका छन् ।
मुख्यमन्त्री शाहीले सोमबार एक शोक वक्तव्य जारी गर्दै कोरोना भाइरस कोभिड १९ को महामारीका कारण भारतबाट उद्धार गरी ल्याउने क्रममा भएको सडक दुर्घटनाले आफू स्तब्ध भएको बताएका छन् ।
‘अकल्पनीय र पीडादायी दुर्घटनाका कारण निधन तथा घाइते हुनुभएका अधिकांश नागरिक कर्णाली प्रदेशवासी हुनुहुन्छ । यसबाट सम्बन्धित घरपरिवारमा पर्नगएको दुःखप्रति गहिरो सहानुभूति प्रकट गर्छु । दुर्घटनामा घाइते हुनुभएका सबैप्रति शीघ्र स्वास्थ्यलाभको कामना छ ।’ मुख्यमन्त्री शाहीले भनेका छन् ।
मुख्यमन्त्री शाहीले घाइते हरुको उपचार मृतकको शव घरसम्म पु¥याउने व्यवस्था मिलाउन पहल भइरहेको बताउँदै घाईतको उपचारमा कुनै कमी हुन नदिइने प्रतिबद्धतासमेत व्यक्त गरेका छन् ।
मुख्यमन्त्री शाहीले महामारीको बेला दुर्घटनाको खबर पाउनेबित्तिकै उद्धार, उपचार तथा सूचना सम्प्रेषणमा खट्ने सुरक्षा निकाय, स्वास्थ्यकर्मी, सञ्चारकर्मी, सरकारी अधिकारीसहित स्थानीयवासीलाई समेत धन्यवाद ज्ञापन गरेका छन् ।
भारतबाट मजदुरी गरेर फर्किएका मजदूरहरुलाई उद्धार गरी नेपालगञ्ज हुँदै सल्यान लैजाने क्रममा ना ५ ख ५९९५ नंको हायस गाडी रोकिराखेको बा४ख ९०६४ नंको ट्रकमा गएराति करिब १२ः०० बजे ठोक्किँदा दुर्घटना भएको थियो । दुर्घटनामा १२ जनाको मृत्यु र २१ जना घाईते भएको जिल्ला प्रहरी कार्यालय बाँकेले जनाएको छ ।
वि.सं.२०७७ जेठ १९ सोमवार १३:१३ मा प्रकाशित
