Sansar News
२४ असार, काठमाण्डौं । नेपालमा लागू औषध प्रयोगकर्ताको संख्या १ लाख ३० हजार ४२४ रहेको छ ।
जसमा पुरुषको संख्या ९३.३ प्रतिशत रहेको छ भने महिलाको संख्या ६.७ प्रतिशत रहेको तथ्यांकले देखाएको छ ।
विभिन्न संघ संस्थाको सहकार्यमा गृहमन्त्रालयले गरेको सर्वेक्षणका क्रममा यस्तो तथ्यांक भेटिएको हो । मन्त्रालयका अनुसार २०७६ कात्र्तिक १३ देखि देखि २०७७ असार १५ सम्म (१ वर्ष) गरिएको सर्वेक्षणमा यस्तो तथ्यांक आएको हो ।
मन्त्रालयका अनुसार गतवर्ष भन्दा यसवर्ष लागूपर्दाथ सेवनकर्ता घटेका छन् । विगतको ११.३६ प्रतिशतबाट घटेर हाल ५.६ प्रतिशत रहेको बताइएको छ ।
लागू औषध प्रयोगकर्तामध्ये १ लाख २१ हजार ६९२ जना पुरुष र ८ हजार ७३२ जना महिला रहेका छन् ।
प्रयोगकर्ताहरुमध्ये ५१.१ प्रतिशत (५१.९ प्रतिशत पुरुष र ३५.४ प्रतिशत महिला) ले एकान्तमा स्थानमा लागू औषध प्रयोग गर्ने गरेको सर्वेक्षणले देखाएको छ ।
त्यसैगरी ४० प्रतिशत प्रयोगकर्ताहरु कुनै पेशामा आवद्ध नरहेको तथ्यांकले देखाएको छ । लागू औषध प्रयोगकर्ता महिलाहरुको सबैभन्दा ठूलो अनुपात (७१.७ प्रतिशत) बेरोजगार रहेको देखिन्छ । जुन पुरुष प्रयोगकर्ता (३८.० प्रतिशत) को तुलनामा धेरै रहेको सर्वेक्षणमा देखिएको मन्त्रालयले जनाएको छ ।
मन्त्रालयका अनुसार प्रयोगकर्ताहरुमा युवाको संख्या धेरै रहेको छ भने उनीहरुमध्ये कतिपयले २० वर्ष कम उमेरमा नै लागूपर्दाथ सेवन गरेको देखिन्छ । यसको प्रयोगकर्ता मध्ये ८८.० प्रतिशतले गाँजा जन्य, ६३.४ प्रतिशतले अफिमजन्य, ५२.२ प्रतिशतले आनन्ददायी पर्दाथ, ९२.३ प्रतिशतले सुँघ्ने पर्दाथ, २३.८ प्रतिशतले भ्रमात्मक पदार्थ र ४५.८ प्रतिशतले उत्तेजनात्मक पर्दाथ सेवन गरेको देखिन्छ ।
वि.सं.२०७७ असार २४ बुधवार १५:२० मा प्रकाशित
