काठमाडौं । सत्तारुढ नेपाल कम्युनिस्ट पार्टी (नेकपा)को सचिवालय बैठक अध्यक्षद्वयबाटै सहमतीय खोज्ने निर्णयसहित सम्पन्न भएको छ । पार्टी विवाद समाधान गर्ने भन्दै प्रधानमन्त्री निवास बालुवाटारमा झण्डै चार घण्टा चलेको सचिवालय बैठक पुनः अध्यक्षद्वयबाटै समाधान खोज्ने निर्णयसहित सम्पन्न भएको पार्टी प्रवक्ता नारायणकाजी श्रेष्ठले जानकारी दिएका छन् ।
पत्रकारसँग कुराकानी गर्दै उनले बैठकमा पार्टी विवाद कसरी हल गर्ने र एकतालाई कसरी जोगाउने भन्नेमा रहेको बताए । बैठकमा सबै नेताहरुले खुलेर आफ्नो कुरा राखेको उनको भनाई छ ।
श्रेष्ठका अनुसार बैठकमा सहमतीका लागि कुनै औपचारिक प्रस्ताव भने आएको थिएन । उनले जनाएअनुसार भोली बोलाइएको स्थायी समिति बैठक निर्धारित समयमै बस्नेछ ।
नेकपाभित्र विवाद बढ्दै जाँदा जारी स्थायी समिति बैठक असार १८ देखि बारम्बार स्थगित हुँदै आएको छ । स्थायी समिति बैठकका बीच प्रधानमन्त्री एंव पार्टी अध्यक्ष केपी शर्मा ओलीको राजीनामा मागिएसँगै नेकपाभित्र विवाद चर्किएको थियो । प्रधानमन्त्रीले भने राजीनामा नदिने बताउँदै आएका छन् ।
बैठक सकिए लगत्तै प्रधानमन्त्री ओली राष्ट्रपति निवासतिर लागेका छन् ।
वि.सं.२०७७ साउन ३ शनिवार २०:०८ मा प्रकाशित