हामी सबैकाे संसारन्यूज

कक्षा १२ को परीक्षामा सहभागी हुन कक्षा ११ का हरेक विषयको सैद्धान्तिकतर्फ न्यूनतम डीप्लस र प्रयोगात्मकतर्फ न्यूनतम सीग्रेड प्राप्त गर्नुपर्नेछ ।

८ साउन, काठमाडौं । राष्ट्रिय परीक्षा बोर्डले कक्षा ११ को परीक्षा सञ्चालन, व्यवस्थापन, मूल्याङ्कन, नतिजा प्रकाशन तथा प्रमाणीकरण कार्यविधि, २०७७ सार्वजनिक गरेको छ ।

यसअघि बोर्डले लिँदै आएको कक्षा ११ को वार्षिक परीक्षा सम्बन्धित विद्यालयले नै लिने भएपछि त्यसका लागि कार्यविधि जारी गरिएको हो ।

सो कार्यविधिमा विद्यालयले आफैले मिति तय गरेर परीक्षा सञ्चालन गर्न पाउने अधिकार दिइएको छ । कार्यविधिमा विद्यालयले वार्षिक परीक्षा सञ्चालन गर्नुपूर्व उक्त परीक्षाको मिति र समयका बारेमा छिटो छरितो माध्यमबाट बोर्डका सम्बन्धित कार्यालयहरुलाई जानकारी गराउनुपर्ने स्पष्ट गरेको छ । परीक्षाका लागि प्रश्नपत्र र उत्तरकुञ्जिका पनि विद्यालय आफैले तयार गर्नुपर्ने हुन्छ । त्यसका लागि बोर्डले तोकेको मापदण्ड पालना गर्नुपर्ने हुन्छ ।

त्यस्तै कक्षा ११ मा नियमिततर्फ कम्तीमा ७० प्रतिशत हाजिरी भएका विद्यार्थीले मात्र परीक्षा दिन पाउने व्यवस्था गरिएको छ । विद्यार्थीले कक्षा ११ मा अध्ययनका लागि विषयहरु बोर्डमा रजिष्ट्रेसन गराउनुपर्ने हुन्छ । विषय छनौटको आधार पाठ्यक्रम विकास केन्द्रले तय गरेअनुसार हुने बताइएको छ ।

कक्षा ११ को मूल्याङ्कन अक्षराङ्कन पद्धतिबाट नै हुनेछ । कक्षा ११ मा जुन विषय अध्ययन गरेको हो विद्यार्थीलाई सोही विषयमा कक्षा १२ मा अध्ययन गर्न दिइने व्यवस्था छ ।

विद्यार्थीको मूल्यांकन मूलतः कक्षा सहभागिता, कक्षाकार्य, परियोजना कार्य, गृहकार्य, सामुदायिक कार्य,
सह/अतिरिक्त क्रियाकलाप, प्रस्तुतीकरण, सामुहिक कार्य, लिखित तथा मौखिक इकाई/मासिक परीक्षाहरू
आदिको आधारमा गर्नुपर्ने भनिएको छ ।

आगामी वर्ष कक्षा १२ को परीक्षा वैशाख/जेठ महिनामा सञ्चालन हुने एकै दिनमा एक सिफ्ट वा एकै दिनमा दुई सिफ्टमा फरक विषय वा एक दुई सिफ्टमा एउटै विषयको परीक्षा सञ्चालन गर्न पाइनेछ । एकै दिनमा सिफ्टका आधारमा एउटै विषयको परीक्षा सञ्चालन गर्दा फरक प्रश्नपत्रबाट परीक्षा सञ्चालन गर्नुपर्ने कार्यविधिमा स्पष्ट उल्लेख छ ।

कक्षा १२ को परीक्षामा सहभागी हुन कक्षा ११ का हरेक विषयको सैद्धान्तिकतर्फ न्यूनतम डीप्लस र प्रयोगात्मकतर्फ न्यूनतम सीग्रेड प्राप्त गर्नुपर्नेछ ।