हामी सबैकाे संसारन्यूज

९ साउन, सिन्धुपाल्चोक । जिल्लामा बाढीपहिराले ठूलो जनधनको क्षति भएपछि मित्रराष्ट चीनले खाद्यान्नलगायत अन्य आवश्यक सामग्री सहयोग गर्ने प्रतिबद्धता गरेको छ ।

नेपाल–चीन सीमा मितेरी पुलमा आज सम्पन्न सीमा सुरक्षा बैठकमा चीनको नेलमा कन्ट्री सरकारले बाढीपहिराबाट प्रभावितका लागि सहयोग गर्ने प्रतिबद्धता गरेको हो । सीमा सुरक्षा बैठकमा नेपालका तर्फबाट सहभागी प्रमुख जिल्ला अधिकारी उमेशकुमार ढकालले बाढीपहिरो प्रभावितलाई सहयोग गर्न आग्रह गरेका थिए । “हामीले केही सहयोग गर्न आग्रह गरेका छौँ”, चीनका अधिकारी सकारत्मक हुनुहुन्छ”, बैठक पछि प्रजिअ ढकालले भने ।

चीन सरकारले खाद्यान्न, टेन्ट औषधीलगायतका सामग्री प्रदान गर्ने जानकरी दिएको ढकालले बताए । चीनबाट आउने खाद्यान्नलगायत सामग्री भोटेकोशी गाउँपालिका र बाह्रविसे नगरपालिकाका बाढी पहिरा प्रभावितका लागि वितरण गरिने उनले जानकारी दिए ।

प्रमुख जिल्ला अधिकारी ढकालले भोटेकोशीका बाढी पीडितका बारेमा जानकारी लिएका छन् । उनले आफैँ पुगेर स्थलगत अनुगमनसमेत गरेका थिए । साथै उनले चीनको नेलम जिल्लाका समकक्षीसँग पनि भेटवार्ता गरेका छन् । उनले जिल्ला विपद् व्यवस्थापन समितिबाट पठाएको राहत वास्तविक पीडितले पाए कि पाएनन् भन्ने विषयमा चासो लिएका थिए । (रासस)