हामी सबैकाे संसारन्यूज

१२ साउन, काठमाडौँ । भारतले गुन्जी, कालापानी र लिम्पियाधुराआफ्नो क्षेत्र भन्दै सो क्षेत्रमा नेपालीहरुको अवैध प्रवेश रोक्न आग्रह गरेको छ। नेपालको जिल्ला प्रशासन कार्यालय दार्चुलालाई एक पत्र पठाउँदै भारतको धार्चुला प्रशासनले यस्तो आग्रह गरेको हो ।

‘पत्रमा विशेष सुत्रका अनुसार विभिन्न नेपाली समूह भारतीय क्षेत्र गुन्जी, कालापानी, लिम्पियाधुरामा अवैध रुपमा लुकिछिपी सीमा पार गरेर आउन चाहन्छन्, जसबाट मिडियाको ध्यान आकृष्ट गर्न सकियोस् र दुवै देशको प्रशासनलाई हैरान बनाउन सकियोस्,’ भारतको धार्चुला प्रशासन जिल्ला प्रशासन कार्यालयका उपजिल्ला अधिकारीले जिल्ला प्रशासन कार्यालय दार्चुलालाई पठाएको पत्रमा उल्लेख छ ।

उसले यदि यस्तो यस्तो कुनै सूचना आए जानकारी गराउन पनि जिल्ला प्रशासन कार्यालय दार्चुलालाई आग्रह गरेको छ।

गुन्जी, कालापानी, लिम्पियाधुरा नेपालको भूमि भएपनि भारतले आफ्नो भूमि दाबी गर्दै आएको छ । भारतले यी भूमिलाई आफ्नो नक्सामा पारेर नयाँ राजनीतिक तथा प्र्रशासनिक नक्सा जारी मात्र गरेन भारतले नेपाली भूमि प्रयोग गरेर मानसरोवर जाने बाटो समेत बनाएको छ । यसपछि दुई देशबीच सीमा विवाद चर्किदै गएको अवस्थामा नेपालले पनि गत जेठ महिनामा यी भूमि समेटेर नयाँ नक्सा जारी गरेको छ । नेपालले दुई देशबीच देखिएको सिमा विवादबारे छलफल गर्न भारतलाई पटक पटक पत्र पठाउँदा पनि वास्ता गरेको छैन ।