हामी सबैकाे संसारन्यूज

काठमाडौं । सत्तारुढ नेकपाभित्रको विवाद समाधानको लागि अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच भएको छलफल सकिएको छ । छलफल प्रधानमन्त्री निवास बालुवाटारमा झण्डै तीन घण्टासम्म चलेको थियो ।

आजको छलफलमा कुनै सहमती बन्न नसकेको नेकपा स्रोतले जनाएको छ । जनाइएअनुसार आजको छलफलमा नेताहरुले छलफललाई निरन्तरता दिने सहमती भने गरेका छन् । अध्यक्षद्वयबीच भोली पुनः छलफल हुनसक्ने स्रोतले जनाएको छ ।

आइतबारको छलफलमा अध्यक्षद्वयसँगै पार्टी वरिष्ठ नेता झलनाथ खनाल र संसदीय दलका उपनेता सुवास नेमाङ्गको पनि सहभागीता थियो ।

गत मंगलबार प्रधानमन्त्री ओलीले एकल रुपमा स्थायी समिति बैठक स्थगित गरेसँगै अर्का अध्यक्ष प्रचण्डले बैठकलाई निरन्तरता दिएका थिए । त्यसयता पार्टीभित्रको विवाद झनै चुलिन पुगेको थियो । पार्टीभित्रको विवाद चुलिँदै जाँदा अध्यक्षद्वयबीच समेत संवाद हुन सकेको थिए ।

विवाद चुलिँदै गएको बेला पार्टी महासचिव विष्णु पौडेल र प्रदेश नम्बर ५ का मुख्यमन्त्री शंकर पोखरेले अध्यक्षद्वयबीच संवादको पहल गरेका थिए । बिहिबार र शुक्रबार उनीहरुले दुवै अध्यक्षसँग छलफल गरेका थिए ।

गत असार १० देखि सुरु स्थायी समिति बैठकका बीच बहुमत स्थायी समिति सदस्यहरुले प्रधानमन्त्री ओलीको राजीनामा माग गरेसँगै नेकपाभित्र विवाद उत्कर्षमा पुगेको छ । यसबीच पार्टी विवादकै कारण स्थायी समिति बैठक पनि पटक–पटक स्थगित हुँदै आएको छ भने शीर्ष नेताहरुको संवाद पनि निष्कर्ष विहिन बन्दै गईरहेको छ ।

सम्बन्धित समाचार

बालुवाटारमा ओली, प्रचण्ड र खनालबीच छलफल, सहमती खोज्ने प्रयास हुँदै