हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)का तीन शीर्ष नेताबीच बालुवाटारमा छलफल भईरहेको छ । नेकपा स्रोतले जनाएअनुसार बालुवाटार छलफलमा पार्टी अध्यक्षद्वय केपी शर्मा ओली, पुष्पकमल दाहाल ‘प्रचण्ड’ र वरिष्ठ नेता झलनाथ खनालको सहभागीता छ ।

पार्टीभित्रको आन्तरिक विवादबारे निकास खोज्न नेताहरुबीच बिहान १० बजेदेखि छलफल भईरहेको छ ।

गत मंगलबार तय भएको स्थायी कमिटीको बैठक प्रधानमन्त्रीसमेत रहेका अध्यक्ष ओलीले एकतर्फी स्थगित गरेसँगै अर्का अध्यक्ष प्रचण्डले सञ्चालन गरेका थिए । सहमतीमा बैठकहरु बसाल्दै आइरहेको परिस्थितिमा एकले स्थगन र अर्कोले सञ्चालन गरेसँगै आन्तरिक विवाद चुलिँदै गएको थियो । अध्यक्षद्वयबीच त्यसयता संवादसमेत हुन सकेको थिएन ।

ओली–प्रचण्डबीच संवाद गराउन पूर्वमाओवादीका नेताहरु र पार्टी महासचिव विष्णु पौडेलले सक्रिय भूमिका खेलेका थिए । बिहिबार र शुक्रबार महासचिव पौडेल र प्रदेश नम्बर ५ का मुख्यमन्त्री शंकर पोखरेले दुई नेताहरुलाई भेटेर निकास खोज्नको लागि सहजीकरण गरेका थिए ।

असार १० देखि सुरु भएको स्थायी समिति बैठकमा प्रधानमन्त्री ओलीको राजीनामा माग भएसँगै नेकपामा विवाद चर्किएको थियो । विवादकै कारण स्थायी समिति बैठकसमेत पटक–पटक स्थगित हुँदै आएको छ ।