हामी सबैकाे संसारन्यूज

१८ साउन, वीरगञ्ज। साउन १० गतेदेखि पर्साको वीरगञ्ज महानगरपालिका क्षेत्रभित्रका लागि जारी गरिएको निषेधाज्ञा १९ साउनदेखि जिल्लाभरका लागि जारी गरिएको छ ।

पर्साका प्रमुख जिल्ला अधिकारी विष्णुकुमार कार्कीको अध्यक्षतामा साउन १७ गते शनिबार बसेको जिल्ला सुरक्षा समितिको बैठकले वीरगञ्ज महानगरपालिकाभित्र रहेको निषेधाज्ञा साउन १९ गतेदेखि जारी गर्ने निर्णय गरेको हो ।

पछिल्लो परिस्थितिको विश्लेषण गर्दै कोरोना भाइरस सङ्क्रमण व्यापक रुपमा फैलिन थालेपछि र सङ्क्रमितको व्यवस्थापनमा समस्या भएपछि अर्को सूचना नभइञ्जेलका लागि जिल्लाभर निषेधाज्ञा लगाउने निर्णय जिल्ला सुरक्षा समितिको बैठकले गरेको जिल्ला प्रशासन कार्याल्य पर्साले जनाएको छ ।

कोभिड १९ को रोकथाम, नियन्त्रण, उपचार तथा व्यवस्थापनलाई प्रभावकारी बनाउन सङ्क्रामक रोग ऐन, २०२० को दफा २ तथा स्थानीय प्रशासन ऐन, २०२८ को दफा ६ को उपदफा ३ बमोजिम निषेधाज्ञा लगाइएको पर्साका सहायक प्रमुख जिल्ला अधिकारी ललितकुमार बस्नेतले जानकारी दिए ।

जिप्रका पर्साले सूचना जारी गरी निषेधाज्ञा अवधिभर औषधी उपचार तथा अन्य अत्यावश्यक काममा बाहेक कुनै पनि व्यक्तिहरुलाई घरबाहिर ननिस्कन भनेको छ ।
शान्ति, सुरक्षा, सुव्यवस्था, स्वास्थ्य, खानेपानी, दूध, विद्युत, दमकल, सञ्चार, भन्सार, आईसीपी, ड्राईपोर्ट, बैङ्क (भन्सार, आईसीपी, ड्राइपोर्टमा रहेकामात्र), क्वारेन्टाइन, फोहरमैला व्यवस्थापन, इन्धन, एम्बुलेन्स, औषधिजस्ता अति आवश्यक सेवाबाहेक अन्य सम्पूर्ण पसल, उद्योग र व्यवसाय बन्द गरिने सूचनामा उल्लेख छ ।

स्वास्थ्यकर्मी, सुरक्षाकर्मीले प्रयोग गर्ने साधन, अत्यावश्यक मालसामान ढुवानीका साधनबाहेक सबै प्रकारका सार्वजनिक तथा निजी सवारी साधन सञ्चालनमा रोक लगाइएको छ । छिमेकी देश भारतसँग सिमाना जोडिएका नाकाहरू तथा खुल्ला सिमानाको जुनसुकै स्थानबाट मानिसको आवागमन रोक लगाउने जनाइएको छ ।
कोभिड १९ को सङ्क्रमण रोकथाम एवम् नियन्त्रण गर्न तथा जिल्लामा शान्ति सुव्यवस्था कायम गर्न धेरै सङ्क्रमण भएका तथा अति जोखिममा रहेका स्थानहरूमा नेपाल प्रहरी र सशस्त्र प्रहरी बलको अतिरिक्त स्थानीय प्रशासन ऐन, २०२८ को दफा ६ को उपदफा २ अनुसार नेपाली सेनासमेत परिचालन गर्ने स्थानीय प्रशासनले जनाएको छ ।

पर्सामा साउनमा मात्रै १२ जना सङ्क्रमितको मृत्यु भएको छ भने पर्याप्त आइसोलेसन सेन्टर नहुँदा अधिकांश सङ्क्रमितहरूलाई घरमै राखिएको छ । लक्षणसहितका सङ्क्रमितलाई मात्रै आइसोलेसन सेन्टरमा राख्ने नीति अख्तियार गरिएको छ । होटलमा पेड आइसोलेसनको व्यवस्था पनि मिलाइएको छ ।