Sansar News
२३ साउन, विराटनगर । छरछिमेकको सामान्य विवादमा मोरङको बुढीगंगा गाउँपालिका–२ खार्जीका मुसहरमाथि मध्यराती तरबार, भाला र रडले मरणासन्न हुने गरी आक्रमण गरिएको छ ।
आक्रमनबाट पाँच जना गम्भिर घाइते भएका छन् । पक्रउ गरिएका आक्रमणकारी प्रहरीले छाडेपछि त्रसित पीडित परिवारकी एक महिलाले बिहिबार आत्महत्या गरेकी छिन् । सामान्य विवादमा सरस्वती ऋषिदेवको परिवारसँग बदला लिन स्थानीय बैजनाथ यादवले विराटनगर–१४ जतुवाबाट २० जना गुन्डा बोलाएर आक्रमण गराएको स्थानीय प्रत्यक्षदर्शीको भनाइ छ ।
१९ साउनको राती मोटरसाइकल र इलेक्ट्रिक रिक्सामा आएका उनीहरुले तरबार, भाला र रडले आक्रमन गरेको पीडितहरुले बताएको शुक्रबारको नयाँपत्रिका दैनिकले लेखेको छ ।
आक्रमणबाणबाट ५० वर्षीय सरस्वती, उनका भाइहरु ४० वर्षीय पन्नालाल, ३८ वर्षीय चुन्नीलाल, ३५ वर्षीय रामजी र ३३ वर्षीय श्याम गम्भिर घाइते भएका छन् ।
तरबारले सरस्वतीको छातीको देब्रेभाग नै छिनालिएको छ । अन्यको टाउको, गर्धन र शरिरभरि ठुल्ठुला’ घाउँ बनेका छन् ।
प्रत्यक्षदर्शी स्थानीय सरस्वती मगरका अनुसार बैजनाथको घरमा साझँ हुलका हुल नयाँ मान्छे आएको थाहा पाएपछि प्रहरीलाइ खबर गरिएको थियो । तर, प्रहरीले बैजनाथका पाहुना भनेर सोधपुछ गर्नसमेत रुचि देखाएन । आक्रमण भएपछि घटनास्थल पुगेको निमुवा इलाका प्रहरी कार्यलयको टोलीले त रगताम्य घाइतेलाई अस्पताल लैजानसमेत सघाएन ।
घाइतेहरु रातभर घरमै छटपटाइरहे । प्रहरीको असहयोगका कारण लकडाउनका बेला घाइतेलाई अस्पताल लग्न नसकेको स्थानीय बासिन्दाले बताए । मुसहर परिवारमाथि आक्रमण भएको सूचना पाएपछि भोलिपल्ट विहान छिमेकी बुढीगंगा गाउँपालिकाबाट आएका कांग्रेस गाउँ कमिटि सभापति जितनारायण थापाले पीडितलाई अस्पताल पुरयाएको थिए । उनीहरुको बुढीगंगा टंकीस्थित विराट मेडिकल कलेजमा उपचार भइरहेको छ ।
वि.सं.२०७७ साउन २३ शुक्रवार ०९:५३ मा प्रकाशित
