Sansar News
२३ साउन, काठमाडौँ । निजी क्षेत्रको हवाइ सेवा प्रदायक कम्पनी बुद्ध एयरले सात मुख्य सहरको एकतर्फी सुरुवाती भाडादर सार्वजनिक गरेको छ ।
कोरोना भाइरस(कोभिड –१९) को महामारी नियन्त्रण गर्न लामो समयदेखि बन्द रहेको आन्तरिक उडान भदौ १ देखि सञ्चालन हुन लागेकोले बुद्ध एयरले भाडादर सार्वजनिक गरेको छ ।
देशको विषम परिस्थितिमा हरेक नेपालीले सजिलै र सस्तो हवाई यात्रा गर्ने उद्देश्यले हामी भदौ १ देखि हुने हवाई उडानका लागि भाडादर पनि न्यून तोकेको एयरलायन्सले जनाएको छ ।
कम्पनीले विराटनगर, भैरहवा, नेपालगञ्ज, पोखरा, भद्रपुर, जनकपुर र धनगढीको भाडादर सार्वजनिक गरेको हो ।
जसअनुसार विराटनगरका लागि ३ हजार, भैरहवाका लागि २७ सय, नेपालगञ्जका लागि ४२ सय, पोखराका लागि १९ सय, भद्रपुरका लागि ३४ सय, जनकपुरका लागि २७ सय र धनगढीका लागि सुरुवाती एकतर्फी भाडा ५४ सय रुपैयाँ तोकेको छ ।
पछिल्लो समयमा काठमाडौँ उपत्यका लगायत देशसँग दिनहुँ संक्रमित बढीरहेको सन्र्दभमा सडकमार्गबाट महँगोमा काठमाडौं आउजाउ गर्नु परिरहेकोले उडान खोल्नुपर्ने एयरलायन्सले बताएको छ । कोरोना भाइरसको सुरक्षाका लागि कम्पनीले सम्पूर्ण प्रबन्ध गरेको समेत बताइएको छ ।
वि.सं.२०७७ साउन २३ शुक्रवार १४:४९ मा प्रकाशित
