Sansar News
काठमाडौं । सरकारले कोरोना संक्रमण फैलिएका क्षेत्रमा थप कडाई गर्ने तयारी गरेको छ । आज साँझ बस्ने मन्त्रिपरिषद बैठकले कोरोना संक्रमण बढ्दै गएका क्षेत्रमा थप कडाई गर्नेबारे निर्णय लिने तयारी गरेकाे बालुवाटार स्राेतले जनाएकाे छ ।
बैठक प्रधानमन्त्री निवास बालुवाटारमा आज साँझ ५ बजेदेखि बस्नेछ ।
बैठकले विद्यालय भर्ना, लामो दूरीका सवारीसाधन सञ्चालन तथा आन्तरिक एवं बाह्य उडानको समयावधि थपका विषयमा पनि महत्वपूर्णं निर्णय गर्न सक्नेछ । यसअघि आइतबार बसेको कोरोना संकट व्यवस्थापन केन्द्र (सीसीएमसी)को बैठकले सार्वजनिक यातायात बन्द र हवाई सेवा तत्काल नखोल्न सरकारलाई सुझाव दिएको थियो ।
सीसीएमसीले सरकारी कार्यालयहरु आधा कर्मचारी राखेर सञ्चालन गर्ने, सभा, सम्मेलनमा रोक लगाउने, अत्यावश्यक बाहेकका पसल बन्द गर्न पनि सुझाव दिएको छ । सीसीएमसीको उक्त प्रस्ताव मन्त्रिपरिषदमा पेश भएपछि छलफल गरेरमात्रै निर्णय हुने भएको हो ।
सरकारले यसअघि भदौ १ गतेदेखि विद्यालय भर्ना, लामो दूरीका सवारीसाधन र आन्तरिक एवं बाह्य उडान खुला गर्ने निर्णय गरेको थियो।
वि.सं.२०७७ साउन २६ सोमवार १३:४९ मा प्रकाशित
