Sansar News
२६ साउन, काठमाडौँ । सरकारले भदौ १५ सम्म सार्वजनिक यातायात सञ्चालनमा रोक लगाउने निर्णय गरेको छ ।
आज साँझ बसेको नियमित मन्त्री परिषद्को बैठकले १ भदौबाट खुला गर्ने भनिएको क्षेत्र थप १५ दिन नखोल्ने निर्णय गरेको हो ।
बैठकले सार्वजनिक यातायात र हवाइ उडान भदौ १६ गतेदेखि मात्र सञ्चालन गर्ने निर्णय गरेको छ ।
त्यस्तै बैठकले नाकाहरुका साथै एक जिल्लाबाट अर्को जिल्ला प्रवेशमा पनि थप कडाई गर्ने निर्णय पनि गरेको छ ।
यसअघि ५ साउनमा बसेको मन्त्रिपरिषद् बैठकले चार महिना लामो लकडाउन अन्त्य गर्दै अन्तर जिल्ला यातायात, बाह्य तथा आन्तरिक हवाई उडान तथा विद्यालय भर्ना लगायतका गतिविधि भदौ १ गतेदेखि निर्णय गरेको थियो ।
कोभिड—१९ संकट व्यवस्थापन सेन्टर (सीसीएमसी)को आइतबारको बैठकले १५ दिन सार्वजनिक सवारी साधन सञ्चालनमा रोक लगाउन तथा सीमा नाकाहरुमा थप कडाइ गर्न सरकारलाई सिफारिस गरेको थियो ।
आजै काठमाडौँका स्थानीय निकायको साझा मञ्च उपत्यका नगरपालिका फोरमले पनि कोरोनाको सङ्क्रमण तीव्ररुपमा फैलिएको भन्दै आगामी भदौ १५ गतेसम्म सार्वजनिक यातायातमा रोक लगाउन सरकारलाई सुझाव दिएको थियो ।
वि.सं.२०७७ साउन २६ सोमवार २१:४५ मा प्रकाशित
