हामी सबैकाे संसारन्यूज

१० भदौ, काठमाडौं । हाल देशभर सामान्य बदली रही देशका थोरै स्थानहरुमा मेघगर्जन÷चट्याङ्ग सहित हल्का देखि मध्यम वर्षा भइरहेको छ ।

आज प्रदेश १, बागमती प्रदेश, गण्डकी प्रदेश, प्रदेश ५ र कर्णाली प्रदेशका एक÷दुई स्थानहरुमा भारी वर्षाको सम्भावना रहेको जल तथा मौसम पूर्वानुमान महाशाखाले जनाएको छ ।

उक्त स्थानहरुका नदीमा पानीको बहाव बढ्ने, पहाडी क्षेत्रमा भू-क्षय हुने, पहिरो जाने, सडक तथा हवाई यातायात प्रभावित हुने भएकोले आवश्यक सतर्कता अपनाउन पनि महाशाखाले अनुरोध गरेको छ ।

आज कुन-कुन नदीमा पानीको बहाव उच्च हुने सम्भवाना छ त ?
महाशाखाका अनुसार आगामी ३ दिन देशैभरका प्रमुख तथा मझौला नदीहरुमा बहाब सामान्य घटबढ हुने तथा सतर्कता भन्दा तलै हुने छ ।
आज प्रदेश २, बागमती, गण्डकी प्रदेश, प्रदेश ५,कर्णाली र सुदूरपश्चिम प्रदेशको केहि पहाडी जिल्लामा क्षणिक मध्यम बर्षा भई स–साना नदीमा बहाब बढ्ने र केहिमा आकस्मिक बहाब हुन सक्ने पनि महाशाखाले जनाएको छ ।

आज संखुवासभा, ओखलढुंगा, दोलखा, रामेछाप, सिन्धुली, काभ्रेपलान्चोक, काठमाडौं उपत्यकाका, सिन्धुपाल्चोक, रसुवा, नुवाकोट, धादिङ, गोरखा, लम्जुङ, तनहुँ, कास्की, म्याग्दी, बाग्लुङ, पर्वत, पाल्पा, रुपन्देही, प्यूठान, रोल्पा, रुकुम, दाङ, सुर्खेत, दैलेख, सल्यान, कालिकोट, जुम्ला, डोटी, अछाम, दार्चुला, बाजुरा, बैतडी र डडेल्धुरा आसपासका जिल्ला भइ बहने स-साना नदीमा बहाव केही बढ्ने र सहायक नदीमा आकस्मिक बहाव हुन सक्ने पूर्वानुमान गरिएकोले नदी तटीय क्षेत्रमा शतर्कता अपनाउन अनुरोध गरिएको छ ।