Sansar News
११ भदौं, काठमाडौँ । उच्च शिक्षा अध्ययनका लागि विदेश जान चाहने विद्यार्थीलाई वैदेशिक अध्ययन अनुमति पत्र (एनओसी) खुल्ला भएको छ। कोभिड १९ को संक्रमण त्रास बढेको भन्दै सरकारले गत फागुनदेखि रोकेको एनओसी खुल्ला गर्ने निर्णय गरेको शिक्षा, विज्ञान तथा प्रविधिमन्त्री गिरिराजमणि पोखरेलका स्वकीय सचिव पुरन केसीले बताए ।
मंगलबार बसेको मन्त्रिपरिषद् बैठकले विदेशी शैक्षिक संस्थाहरूबाट उच्च शिक्षा अध्ययन स्वीकृति लिएर बसेका विद्यार्थीका लागि एनओसी दिएर अध्ययनको बाटो खुला गरेको हो। मन्त्री पोखरेलले एनओसी जारी गरिनुपर्ने प्रस्ताव मन्त्रिपरिषद्मा पेस गरेका थिए।
शिक्षा मन्त्रालयका उच्च शिक्षा महाशाखा प्रमुख एवं सहसचिव रामशरण सापकोटाले मन्त्रिपरिषद्को निर्णयपछि अब मन्त्रालयले अनलाइनमार्फत नयाँ विद्यार्थीका लागि एनओसी फाराम लिने व्यवस्था गर्ने बताए।
एनओसी खुल्ला गरिएपछि विद्यार्थीले तत्काल विदेश जान नपाए पनि भर्नाका लागि सिट सुरक्षित गर्न सक्छन्। कलेज तथा विश्वविद्यालयमा शुल्क तिर्न पाउँछन्।
एनओसी रोकिंदा नेपालमै बसेर अनलाइन पढ्न चाहने तथा विदेशमा भिसाको म्याद थप्न खोज्ने विद्यार्थीलाई समस्या परेको थियो।
वि.सं.२०७७ भदौ ११ बिहीवार ०८:३३ मा प्रकाशित
