हामी सबैकाे संसारन्यूज

काठमाडौं । पूर्वी लद्दाखमा भारतीय सेना र चिनियाँ सेनाबीच भएको झडपमा भारतीय सेनाका एक जवानको ज्यान गएको छ । भारतीय सञ्चार माध्यमले जनाएअनुसार झडपमा तिब्बती मुलका एक स्पेशल सैन्य जवानको ज्यान गएको हो । जनाइएअनुसार झडपमा केही अन्य सैन्य जवान पनि घाईते छन् ।

घटना चिनियाँ पक्ष तिर के कति क्षति भएको भन्ने हालसम्म जानकारी आएको छैन् । भारतीय पक्षले चिनियाँ सेना तर्फ पनि केहिको ज्यान गएको दाबी गरेको छ ।

भारतीय सेना र चिनियाँ सेनाबीच पूर्वी लद्दाखमा २९ र ३० अगस्टको रात हिंस्रक झडप भएको थियो । भारतीय पक्षले जनाएअनुसार ५ सयको संख्यामा रहेका चिनियाँ सेनाले भारतीय सैन्य क्याम्पमाथि कब्जाको कोसिस गरेका थिए । सैन्य क्याम्प कब्जा गर्ने चिनियाँ सेनाको कोसिसमा भारतीय पक्षले पनि जवाफ फर्काएको थियो ।

यसअघि १५ जुनमा लद्दाखको गलवान क्षेत्रमा चिनियाँ र भारतीय सेनाबीच हिंस्रक झडप भएको थियो । जसमा भारतर्फबाट २० सैनिक जवानको ज्यान गएको थियो । उक्त घटनामा चिनियाँ पक्षतर्फ के–कतिको ज्यान गयो भन्ने कुरा अहिलेसम्म पनि पुष्टी भएको छैन् ।
भारतीय पक्षले उक्त झडपमा ३५ चिनियाँ सैन्यको ज्यान गएको दाबी गर्दै आएको छ ।

भारतीय र चिनियाँ सैनिक बीच पछिल्लो साढे तीन महिनादेखि पूर्वी लद्दाखमा निरन्तर तनाव छ । सीमा क्षेत्रलाई लिएर भएको तनावमा दुई पक्षबीच पटक–पटक वार्ता भएपनि समाधान निस्कन सकेको छैन् ।