हामी सबैकाे संसारन्यूज

१७ भदौँ, काठमाडौँ । नेपाल टेलिकमले आफ्ना कर्मचारीहरुलाई कोरोना भाइरस(कोभिड– १९) को पिसिआर परीक्षण ३४ सय ९० मै गर्ने भएको छ ।

टेलिकमले आफ्ना कर्मचारीहरुलाई कोरोना संक्रमणबाट सुरक्षित राख्ने उद्देश्यले पीसीआर परीक्षणको लागि दुई स्वास्थ्य संस्था स्वीकृत गरेको र एक हप्ता भित्रै सम्झौता हुने टेलिकमका सह प्रवक्ता रन्जित लोहियाले संसारन्युजसंग बताएका छन ।

टेलिकमले कोरोनाको पीसीआर परीक्षणको लागि काठमाडौं उपत्यका र उपत्यका बाहिरका जिल्लाहरुका लागि छुट्टाछुट्टै टेण्डर आह्वान गरेको थियो । जसअनुसार कम्पनीले काठमाडौं उपत्यकामा बि एण्ड बि अस्पताल र काठमाडौं उपत्यका बाहिरको लागि बिध म्यानेजमेन्ट प्रालि छनौट गरेको सहप्रवक्ता लोहियाले बताए ।

मंगलबारको गोरखापत्रमा बिएण्ड बिसँग ३७ लाख ८६ हजार ६५० रुपैयाँ र बिध म्यानेजमेन्ट प्रालिले ४३ लाख ५ हजार रुपैयाँमा टेण्डर पारेको सूचना टेलिकमले सार्वजनिक गरेको छ ।

काठमाडौ भित्र बि एण्ड बि अस्पतालले प्रति व्यक्ति ३ हजार ४ सय ९० रुपैयाँमा पिसिआर परीक्षण गर्ने भएको छ भने काठमाडौँ बाहिर बिध म्यानेजमेन्टले ४ हजार २०० रुपैयाँमा गर्ने भएको छ । यी संस्थाहरुले टेलिकमको कार्यालयमा नै गएर पिसिआर परीक्षण गर्ने बताईएको छ ।

सरकारले ३ दिन अघि पीसीआर परीक्षण दर घटाएर ४ हजार ४०० तोकेको छ । टेलिकमले टेण्डरबाट सरकारी दर भन्दा सस्तोमा परीक्षण गर्न लागेको हो । मर्मत तथा फ्रन्टलाइनमा बसेर काम गर्ने कर्मचारीलाई पहिलो प्राथमिकतामा राखि सबै कर्मचारीको क्रमशः परीक्षण गरिने बताइएको छ ।