हामी सबैकाे संसारन्यूज

३ असोज, काठमाडौं । नेपाल विद्युत् प्राधिकरणका निर्वतमान कार्यकारी निर्देशक कुलमान घिसिङले आफ्ना समर्थकहरुलाई प्रदर्शन नगरिदिन अनुरोध गरेका छन् ।

प्राधिकरणको कार्यकारी नेतृत्वको निरन्तर वा परिवर्तन नियमित एवं स्वभाविक प्रक्रिया भएकाले यसलाई सबैले आत्मासाथ गर्नैपर्ने समेत उनले बताएका छन् ।

उपत्यका लगायत देशैभरीका विभिन्न स्थानमा कुलमानलाई विद्युत् प्राधिकरणमा पुनः नियुक्तको माग सहित प्रदर्शन हुन लागेपछि उनले शनिबार एक विज्ञप्ति जारी गर्दै आफ्ना समर्थकलाई प्रदर्शनमा नउत्रिन अनुरोध गरेका हुन् ।

‘विश्ववमयपी रुपमा फैलिएको कोभिड १९ का कारण नेपाल पनि आक्रान्त भएका बेला मलाई प्राधिकरणको कार्यकारी निर्देशकमा निरन्तरता दिनुपर्ने माग राखी महामारीको संवेदनशील अवस्थामा भिडाभाड गरी प्रदर्शन नगरिदिनुहुन सबैलाई हार्दिक अनुरोध छ ।’ कुलमानद्धारा जारी विज्ञप्तिमा भनिएको छ ।