हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा) मन्त्रिमण्डल पुनर्गठनको तयारीमा छ । गत भदौ २६ मा सम्पन्न स्थायी समिति बैठकको निर्णयअनुसार नेकपा मन्त्रिमण्डल पुनर्गठनको तयारीमा जुटेको हो ।

आइतबार र मंगलबार सम्पन्न सचिवालय बैठकले पुनर्गठन गर्न नीतिगत निर्णय गरेको थियो । बैठकले पुनर्गठनबारे ३ वटा प्रस्ताव अगाडि सारेको थियो । जसमा प्रधानमन्त्रीबाहेक सबैलाई बिदाई गर्ने, दुई वर्ष पुरा गरेकालाई बिदाई गर्ने र तेस्रो बिकल्पमाका रुपमा कार्य सम्पादनको मूल्याकनको आधारमा हेरफेर गर्ने छ ।

नेकपा स्रोतले बताएअनुसार सचिवालय बैठकले अगाडि सारेका तीन प्रस्तावमध्ये प्रधानमन्त्रीसमेत रहेका पार्टी अध्यक्ष ओली केहीलाई मात्रै फेर्ने लाईनमा छन् । उनी कार्यसम्पादन मुल्यांकनको आधारमा केहिलाई बिदा गर्ने र केहिलाई राख्ने लाईनमा छन् ।

तर, पार्टीका कार्यकारी अध्यक्ष प्रचण्डले भने सबै सेट नै परिवर्तन गर्नुपर्ने लाईनमा रहेको बुझिएको छ । यसअघि सम्पन्न सचिवालय बैठकमा भएको छलफलमा पनि प्रचण्डसहित वरिष्ठ नेता झलनाथ खनाल र माधवकुमार नेपालले पनि पुरै सेट परिवर्तन गर्नुपर्ने लाईनमा देखिएका थिए ।

बिहिबार पार्टीअध्यक्षद्वयबीच झण्डै तीन घण्टासम्म चलेको छलफलमा पनि कुन मोडेलमा जाने भन्ने निष्कर्ष निस्किएको थिएन् । नेकपा स्रोतले बताएअनुसार आज जारी छलफल पनि मोडेलको विषयमा नै केन्द्रित छ । नेकपाभित्रका नेताहरु एक /दुई दिनभित्रै मोडेलमा सहमती भई सरकार मन्त्रिमण्डल पुनर्गठन तिर लाग्ने बताउँछन् ।