हामी सबैकाे संसारन्यूज

काठमाडौं – सार्वजनिक सवारी साधनमा कोरोना जोखिम न्युनिकरणका लागि विभिन्न संघसँस्थाहरुको संयुक्त पहलमा अभियानको शुरुवात भएको छ । आज काठमाडौंमा एक कार्यक्रमको आयोजना गरि महानगरीय ट्राफिक प्रहरी महाशाखा, नेपाल राष्ट्रिय प्रगतिशिल श्रमिक संगठन र विभिन्न ७ वटा यातायात संगठनहरुको संयुक्त आयोजनामा अभियानको शुरुवात गरिएको हो ।

गोकर्णेश्वर नगरपालिकाका प्रमुख सन्तोष कुमार चालीसेको प्रमुख आतिथ्यतामा शुभारम्भ गरिएको अभियानले काठमाडौं उपत्यका भित्र सञ्चालन हुने विभिन्न सार्वजनिक यातायातका सवारी साधनलाई कोरोना संक्रमण मुक्त बनाउनका लागि आवश्यक काम गर्नेछ । सबै सवारी साधनलाई त सम्भव हुने कुरा भएन तर हामीले सरकारले तोकेको मापदण्डलाई कार्यान्वन गर्नको लागि निश्चित सार्वजनिक सवारी साधनलाई संक्रमण मुक्त बनाउने काम गर्नेछौं, कार्यक्रमका अध्यक्ष तथा नेपाल राष्ट्रिय प्रगतिशिल यातायात श्रमिक संगठनका अध्यक्ष राजेन्द्र शर्माले बताए ।

संगठनका अध्यक्ष शर्माका अनुसार अभियानले सार्वजनिक यातायातमा यात्रा गर्ने यात्रुलाई सुरक्षित यात्रा गर्नको लागि सहयोग गर्नेछ । संक्रमणको अवधिभर अभियान जारी रहने अध्यक्ष शर्माको भनाई छ ।

अभियानको शुभारम्भ कार्यक्रममा विशेष अतिथि शर्मा सहित सार्वजनिक यातायात महासंघका वरिष्ठ उपाध्यक्ष किरण रिजाल र अतिथिको रुपमा सार्वजनिक यातायात महासंघका महासचिव भरत नेपाल र ट्राफिक ईन्सपेक्टर नविन कुमार अधिकारी लगाएतले मन्त्यव्य राखेका थिए ।