Sansar News
काठमाडौं । नेपाल कम्युनिष्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल ‘प्रचण्ड’ आज पनि छलफलमा जुटेका छन् । मन्त्रिपरिषद पुनर्गठन गर्न दुई अध्यक्षहरु मध्यान्ह १२ बजेदेखि बालुवाटारमा छलफलमा जुटेका हुन् ।
दुई अध्यक्षहरु केहि दिनदेखि मन्त्रिपरिषद पुनर्गठन गर्न निरन्तर छलफलमा छ । गत बिहिबार, शुक्रबार, आइतबार र सोमबार पनि दुई अध्यक्षबीच छलफल भएको थियो । तर दुई अध्यक्षबीच सहमती जुट्न सकेको छैन् ।
गत भदौ २६ मा सम्पन्न स्थायी समिति बैठकले मन्त्रिपरिषद पुनर्गठन गर्ने निर्णय गरेको थियो । स्थायी समितिको निर्णयानुसार गत साता आइतबार बसेको सचिवालय बैठकले मन्त्रिपरिषद पुनर्गठन गर्न नीतिगत निर्णय गरेको थियो ।
सचिवालय बैठकले मन्त्रिपरिषद पुनर्गठन गर्न तयार गरेको खाकाको आधारमा दुई अध्यक्षहरु छलफलमा जुटेका हुन् । तर दुई अध्यक्षबीच क–कसलाई राख्ने र क–कसलाई हटाउने भन्नेमा नै सहमती नभएको बुझिएको छ । साथै नयाँ बन्ने मन्त्रिहरुको विषयमा भाँगवण्डामा सहमती हुन नसकेको बताइएको छ ।
वि.सं.२०७७ असोज १३ मंगलवार १३:०५ मा प्रकाशित
