Sansar News
१५ असोज, रुपन्देही । कोरोना संक्रमणबाट पछिल्लो २४ घण्टामा रुपन्देहीमा मात्रै ३ जनाको मृत्यु भएको छ ।
मृत्यु हुनेमा सिद्धार्थनगर नगरपालिका १ बेलहियाका ६५ वर्षीय पुरुषको आज उपचारकै क्रममा भैरहवा मेडिकल कलेजमा मृत्यु भएको छ ।
अस्पतालका जनसम्पर्क अधिकृत सुशील गुरुङका अनुसार सोमबार अस्पताल भर्ना भएका उनमा परीक्षणका क्रममा कोरोना पोजेटिभ देखिएको थियो । उनमा निमोनियाको समेत समस्या रहेको अस्पतालले जनाएको छ ।
त्यसैगरी रुपन्देहीको कोटियामाई वडा नं ८का ४२ वर्षीय पुरुषको बुधबार बेलुका ६ बजे मृत्यु भएको छ । लुम्बिनी प्रादेशिक अस्पतालको फिवर क्लिनिकमा बुधबार दिउँसो भर्ना भएका उनको उपचारका क्रममा बेलुका ६ बजे मृत्यु भएको अस्पतालले जानकारी दिएको छ ।
श्वास प्रश्वासमा समस्या भएपछि उपचारका लागि अस्पताल आएका उनको कोरोना रिर्पोट पोजेटिभ आएको थियो ।
रुपन्देहीकै बुटवल उपमहानगरपालिका वडा नं ८ का ८० वर्षीय पुरुषको पनि उपचारकै क्रममा मृत्यु भएको छ ।
गत १२ असोजमा कोरोना संक्रमण देखिएपछि कोरोना अस्थायी विशेष अस्पतालमा भर्ना भएका उनमा ज्वरो, श्वास प्रश्वासमा समस्या र उच्च रक्तचापको समस्या देखिएपछि सघन उपचार कक्षमा राखेर उपचार गर्ने क्रममा बुधबार राति ११ः३५ मा मृत्यु भएको लुम्बिनी प्रादेशिक अस्पतालले जनाएको छ ।
वि.सं.२०७७ असोज १५ बिहीवार १५:४७ मा प्रकाशित
