हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)का स्थायी समिति सदस्य भीम रावलले कर्णालीका मुख्यमन्त्रीविरुद्व अविश्वासको प्रस्ताव दर्ता हुनु अनिष्टको संकेत भएको बताएका छन् । उनले यस घटनालाई देशको हितमा नभएको पनि बताए ।

सामाजिक सञ्जाल ट्विटमार्फत नेकपा विवादबारे बोल्दै उनले नेकपा नेतृत्वको समयमै ध्यान जानुपर्ने बताए । ‘कर्णाली प्रदेशका मुख्यमन्त्री विरूद्ध पार्टीकै सांसदहरूले प्रस्ताव दर्ता गर्नु अनिष्टको संकेत हुनसक्छ, समयमै नेतृत्वको गम्भीर ध्यान जाओस्, देशहित ठूलो हो’, उनले भने ।

नेकपा,स्थायी समितिले विधि र पद्धतिमा जोड दिदै संघीय र प्रदेश सरकारमा हेरफेर गर्ने निर्णय गरेको थियो।निर्णय कार्यान्वयन नहुँदै कर्णाली प्रदेशका मुख्यमन्त्री विरूद्ध पार्टीकै सांसदहरूले प्रस्ताव दर्ता गर्नु अनिष्टको संकेत हुनसक्छ।समयमै नेतृत्वको गम्भीर ध्यान जाओस्।देशहित ठूलो हो ।

— Bhim Rawal, PhD (@BhimRawal179) October 12, 2020

रावलले यसअघि नेकपाको स्थायी समितिले पार्टीलाई विधि र पद्धतिअनुसार चलाउने गरि निर्णय गरेको सम्झाएका छन् ।

आइतबार एकाएक कर्णाली प्रदेशका मुख्यमन्त्री महेन्द्रबहादुर शाहीविरुद्व नेकपाका १८ सांसदले अविश्वासको प्रस्ताव दर्ता गराएका थिए । ओली पक्षीय नेता तथा हालका प्रदेश सहइन्चार्ज यामलाल कँडेलको नेतृत्वमा शाहीविरुद्व अविश्वासको प्रस्ताव दर्ता गरिएको थियो ।

अविश्वासको प्रस्तावमा हस्ताक्षर गर्ने अधिकांश सांसद पूर्वएमाले पक्षका छन् । १८ सांसदमध्ये ३ जना भने पूर्वमाओवादीका सांसद पनि छन् ।