हामी सबैकाे संसारन्यूज

काठमाडौं । सत्तारुढ नेकपाका अध्यक्ष पुष्पकमल दाहाल ‘प्रचण्ड’ले कर्णाली प्रदेशका असन्तुष्ट समुहसँग भेटघाट गरेका छन् । शुक्रबार कर्णालीका सह–इन्चार्ज यामलाल कँडेल र निलम्बित प्रमुख सचेत गुलाबजंग शाहसँग प्रचण्डले भेटघाट गरेका हुन् ।

नेकपा स्रोतले जनाएअनुसार प्रचण्ड निवासमा भएको भेटमा नेता कँडेल र निलम्बित सचेतक शाहले प्रदेश सरकारमा देखिएका समस्याबारे जानकारी गराएका थिए । ‘उहाँहरुले आफ्नो असन्तुष्टी विषय स्पष्टसँगले राख्नुभयो, जसलाई अध्यक्ष ज्यूले पनि ध्यानपूर्वक सुन्नुभएको छ’, प्रचण्ड निकट स्रोतले भन्यो, ‘अध्यक्ष ज्यूले छिट्टै निकास दिने बचन दिनुभएको छ ।’

यसअघि बिहिबार प्रचण्डले मुख्यमन्त्री महेन्द्रबहादुर शाहीसँग छलफल गरेका थिए ।

गत आइतबार एकाएक कर्णाली प्रदेशका मुख्यमन्त्री महेन्द्रबहादुर शाहीविरुद्व नेकपाका १८ सांसदले अविश्वासको प्रस्ताव दर्ता गराएका थिए । ओली पक्षीय नेता तथा हालका प्रदेश सह–इन्चार्ज यामलाल कँडेलको नेतृत्वमा शाहीविरुद्व अविश्वासको प्रस्ताव दर्ता गरिएको थियो ।

प्रचण्ड र माधव पक्षका सांसद मिलेसँगै अविश्वासको प्रस्ताव त तत्कालका लागि टर्यो तर विवाद साम्य नभएको कारण केन्द्रबाट छलफलका लागि नेताहरुलाई बोलाइएको थियो । प्रधानमन्त्री ओलीले पत्र नै काटेर विद्रोहमा सहभागी सबै नेतालाई काठमाडौं बोलाएका थिए ।