हामी सबैकाे संसारन्यूज

काठमाडौं । सत्तारुढ नेकपाका प्रवक्ता नारायणकाजी श्रेष्ठले प्रधानमन्त्री केपी शर्मा ओलीले भारतीय गुप्तचर संस्था रअका प्रमुख सामन्तकुमार गोयललाई भेटेर राष्ट्रिय सार्वभौमिकता र राष्ट्रिय हितलाई कमजोर पार्ने काम गरेको बताएका छन् । उनले प्रधानमन्त्री ओलीको व्यवहारबाट राष्ट्रिय स्वाभिमान, प्रतिष्ठा र कुटनीतिक ओझ गिरेको बताए ।

‘गम्भीर प्रश्न उठ्छ, विदेशी गुप्तचर अधिकारीसँग प्रमको भेट र कुटनीतिक मुल्य र आचारसँहिता विपरितको यस्तो भेट किन ?’ सामाजिक सञ्जालमा फेसबुकमा श्रेष्ठले भनेका छन्, ‘यसप्रकारको कर्यबाट राष्ट्रिय स्वाभिमान ,प्रतिष्ठा र कुटनीतिक ओझ गिर्ने मात्र होइन, अन्ततस् राष्ट्रिय सार्वभौमिकता र राष्ट्रिय हितलाई कमजोर पार्ने काम हुन सक्दछ ।’

नेपालको इतिहासले पहिलो पटक विदेशी गुप्तचारसँग प्रधानमन्त्रीले कुटनीतिक मर्यादा विपरित समकक्षी झैं वार्ता गरेको श्रेष्ठको भनाई छ । उनले अगाडि भनेका छन्, ‘मेरो विचारमा नेपालको राजनीतिक एवं कुटनीतिक इतिहासमा यस प्रकृतिको यो पहिलो घटना हो, देशको प्रधानमन्त्रीले बिना कुनै निर्धारित कार्यसुचि विदेशी गुप्तचर संस्थाको अधिकारीसँग कुटनीतिक मर्यादा विपरित समकक्षी झैं औपचारिक वार्ता गरेको । नेपालको राष्ट्रिय अनुसन्धान विभागको प्रमुखले आफ्नो समकक्षीलाई निश्चित बिषयमा छलफल गर्न भ्रमणको लागि निमन्त्रणा गरेको हो भने कुटनीतिक मर्यादाअनुरुप शिष्टाचार भेट हुन सक्दथ्यो । त्यो होइन भन्ने स्पष्ट भइसकेको छ ।’

सामन्त कुमार विमान चार्टर गरेर नेपाल आउँदै गर्दा प्रधानमन्त्री ओलीले परराष्ट्र मन्त्तालय र सत्तारुढ पार्टीलाई समेत जानकारी दिइएको श्रेष्ठले बताएका छन् । उनले भनेका छन्, ‘प्रधानमन्त्री ओलीले परराष्ट्र मन्त्रालयको सँस्थागत जानाकारी र उपस्थिति बिना उनलाई भेट्नुभएछ, हाम्रो पार्टीलाई यसबारेमा कुनै पुर्व जानकारी थिएन र पछि पनि पार्टीमा यसबारेमा कुनै सँस्थागत एवं औपचारिक छलफल भएको छैन ।’