हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)का महासचिव तथा अर्थमन्त्री विष्णु पौडेलले पार्टी गम्भीर संकट पुगेको बताएका छन् । आइतबार सामाजिक सञ्जाल ट्विटरमार्फत उनले यस्तो बताएका हुन् ।

‘यतिबेला नेपाल कम्युनिष्ट पार्टी (नेकपा)को एकीकृत र अभिभाज्य अस्तित्वका सामु गम्भीर संकट उत्पन्न भएको छ’, पौडेलले भनेका छन् ।

पार्टी बचाउन पौडेलले सबै नेता तथा कार्यकर्तालाई आह्वान पनि गरेका छन् । उनले अघि भनेका छन्, ‘आपसी अन्तरविरोधलाई सहमतिका साथ समाधान गर्दै पार्टी एकताको रक्षाका लागि योगदान गर्न समस्त नेता, कार्यकर्ता तथा सदस्य कमरेडहरु समक्ष अनुरोध गर्दछु ।’

यतिबेला नेपाल कम्युनिष्ट पार्टी (नेकपा)को एकीकृत र अविभाज्य अस्तित्वका सामु गंभीर संकट उत्पन्न भएको छ । आपसी अन्तरविरोधलाई सहमतिका साथ समाधान गर्दै पार्टी एकताको रक्षाका लागि योगदान गर्न समस्त नेता, कार्यकर्ता तथा सदस्य कमरेडहरु समक्ष अनुरोध गर्दछु ।

— Bishnu Prasad Paudel (@bpaudel1959) November 1, 2020

पछिल्लो समय सत्तारुढ नेकपाभित्र विवाद बढ्दै गएको छ । स्थायी समितिको निर्णय कार्यान्वयनमा जटिलता देखिएसँगै विवाद बढेको हो ।

स्थायी समितिको निर्णयभन्दा बाहिर प्रधानमन्त्री केपी शर्मा ओलीले एकपक्षीय रुपमा राजदूतहरुको नियुक्ती, मन्त्रिपरिषद पुनर्गठनलगायतका काम गरेसँगै विवाद बढेको थियो । पछिल्लो कर्णाली विद्रोह, पर्सा झडप र भारतीय गुप्तचरसँगको गोप्य भेटघाटको विषयले नेकपाभित्र रडाको मच्चिएको छ ।

विवादकै कारण दुईअध्यक्ष प्रधानमन्त्री केपी शर्मा ओली र पुष्पकमल दाहाल ‘प्रचण्ड’बीच पछिल्लो समय राम्रोसँग संवादसमेत हुन सकेको छैन् । दुई अध्यक्षबीच बढेको दुरीका बीच ओलीले वरिष्ठ नेता माधवकुमार नेपालसँग सहकार्यको प्रस्ताव राखेका छन् ।

पार्टी विवाद चरमतातिर पुगेको बेला पौडेलको धारणा सार्वजनिक भएको हो । जसलाई अर्थपूर्णं रुपमा लिन सकिन्छ ।