हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)को सचिवालय बैठक आज बस्दैछ । बैठक प्रधानमन्त्री निवास बालुवाटारमा अपरान्ह ४ बजेदेखि बस्नेछ ।

सचिवालय बैठक प्रधानमन्त्री एंव पार्टी अध्यक्ष केपी शर्मा ओलीको निर्देशनमा पार्टी महासचिव विष्णुप्रसाद पौडेलले बोलाएका हुन् ।

पार्टीभित्र विवाद चर्किदैं गएपछि पार्टीका कार्यकारी अध्यक्ष पुष्पकमल दाहाल ‘प्रचण्ड’सहितका ५ सचिवालय सदस्यले बैठक बोलाउन माग गर्दै गत कात्तिक २२ मा लिखित पत्र बुझाएका थिए । बैठक सोही लिखित पत्रको माग बमोजिम बस्न लागेको हो ।

यसबीच बैठक बोलाउन प्रधानमन्त्री ओलीले अस्वीकार गरेसँगै प्रचण्डसहितका ५ सचिवालय सदस्यहरु २ पटकसम्म अनौपचारिक बैठक बसिसकेका छन् ।

बैठकमा आ–आफ्नै रणनीति

हालसम्म नेकपामा बैठक बस्नुअघि कुन–कुन एजेण्डामा छलफल गर्ने भन्ने विषय दुई अध्यक्ष केपी शर्मा ओली र पुष्पकमल दाहाल ‘प्रचण्ड’बीचको परामर्शपछि तय हुने गरेको थियो । तर, विवादका कारण दुई अध्यक्षबीच सहमती नहुँदा बैठकका एजेण्डा के हुने भन्ने स्पष्ट छैन् ।

आज बोलाइएको सचिवालय बैठकमा के–कस्ता एजेण्डा हुने भन्नेबारे दुवै पक्षले आन्तरिक रणनीति बनाईरहेका छन् । प्रचण्डले आफुँ निकटका वरिष्ठ नेता झलनाथ खनाल, माधवकुमार नेपाल, उपाध्यक्ष बामदेव गौतम र प्रवत्ता नारायणकाजी श्रेष्ठसँग परामर्श गरिरहेका छन् भने ओलीले उपप्रधानमन्त्री ईश्वर पोखरेल र महासचिव विष्णु पौडेलसँग परामर्श गरिरहेका छन् ।

बैठकमा प्रचण्ड पक्षले सरकार सञ्चालन, पार्टी विवादलगायतका विषयमा विस्तृत एजेण्डा उठाउने तयारी गरेको बुझिएको छ ।

जानकारीअनुसार प्रचण्ड पक्षले हालसम्मका सहमती र अध्यक्ष ओलीको भूमिकाबारे समिक्षा गर्न चाहेको छ । गत भदौ २६ मा सम्पन्न स्थायी कमिटी बैठकका निर्णय र त्यसपश्चात ओलीले गरेको नियुक्ती र मन्त्रिपरिषद पुनर्गठनको विषयलाई जोडदार उठाउने प्रचण्ड पक्षको तयारी छ ।

यता ओली पक्षले भने प्रचण्ड पक्षको प्रस्तुतिअनुसार रणनीति तय गर्ने तयारीमा रहेको बुझिन्छ ।

बामदेव र बादलको उपस्थितिप्रति दुवै पक्षको चाँसो

नेकपाभित्रको विवादमा उपाध्यक्ष बामदेव गौतम र सचिवालय सदस्य रामबहादुर थापा ‘बादल’ले खेल्ने भूमिकाप्रति सबैको चाँसो रहन्छ । उनीहरुको भूमिका नै हालसम्म निर्णायक हुँदै आएको छ ।

अध्यादेश प्रकरणपछि गत वैशाख २० र ओलीको राजीनामा माग पछि गत साउन १३ मा बामदेवले खेलेको भूमिकाले समग्र नेकपाभित्रको विवाद नै फरक ढंगले मोडिएको थियो । दुवै समय बामदेवले खेलेको भूमिकाले ओलीलाई सत्ता जोगाउन सहज बनाएको थियो ।

बामदेवसँगै बादलले खेलेको भूमिकाले पनि कुन पक्षको रणनीति अगाडि जाने भन्ने देखिन्छ । पछिल्लो समय बादल ओली नजिक देखिएका छन् । निर्णायक बैठकको चरणमा यी दुवै पात्रको भूमिकाले कुन पक्ष जोगिने भन्ने निर्धारण गर्छ । शुक्रबारको बैठकमा पनि दुवै नेताको भूमिकालाई निकै चाँसोका साथ हेरिएको छ ।