हामी सबैकाे संसारन्यूज

भरतपुर। जङ्गली हात्तीको आक्रमणले एउटा परिवारको खुसी सधैंका लागि खोसिएको छ। घरको मूल अभिभावक गुमाएको पीडा शब्दमा व्यक्त गर्न कठिन छ। यस्तो दुःखद घडीमा भरतपुर महानगरपालिका पीडित परिवारको साथमा उभिँदै राहत, रोजगारी र पुनःस्थापनाको महत्वपूर्ण पहल गरेको छ।

धुर्बे हात्तीको आक्रमणमा परी ज्यान गुमाएका भरतपुर महानगरपालिका–२३ का एक स्थानीयको परिवारलाई भरतपुर महानगरपालिकाले राहत, रोजगारीको सुनिश्चितता तथा आवश्यक सहयोग उपलब्ध गराएको छ।

भरतपुर महानगरपालिकाका कार्यवाहक प्रमुख चित्रसेन अधिकारी, प्रमुख प्रशासकीय अधिकृत वीरेन्द्र भारती, वडा नं. २३ का अध्यक्ष दीपक दवाडी, अन्य वडाध्यक्षहरू तथा महानगरपालिकाका विभागीय प्रमुखहरूको टोली घटनास्थलमै पुगेर शोकसन्तप्त परिवारसँग भेट गर्दै गहिरो समवेदना व्यक्त गरेको थियो।

घटनाप्रति दुःख व्यक्त गर्दै महानगरपालिकाले पीडित परिवारको पुनःस्थापना र जीविकोपार्जनलाई सहज बनाउन परिवारका एक सदस्यलाई रोजगारीको सुनिश्चितता गरेको जनाएको छ। साथै करिब ४ लाख रुपैयाँ आर्थिक सहयोग, खाद्यान्न तथा अन्य आवश्यक राहत सामग्री पनि परिवारलाई हस्तान्तरण गरिएको कार्यवाहक प्रमुख अधिकारीको सचिवालयले जनाएको छ ।

महानगरपालिकाले विपद् र दुःखद घटनाबाट प्रभावित नागरिकको साथमा सधैं रहने प्रतिबद्धता दोहोर्याउँदै आवश्यक सहयोगलाई निरन्तरता दिने जनाएको छ।