हामी सबैकाे संसारन्यूज

काठमाडौं । नेपाली कांग्रेसका युवा नेता गगन थापाले पार्टी वरिष्ठ नेता रामचन्द्र पौडेलको गिरफ्तारी नियोजित भएको बताएका छन् । बुधबार सामाजिक सञ्जालमार्फत गिरफ्तारी प्रधानमन्त्री केपी शर्मा ओलीको राजनीतिक प्रतिशोध र शक्ति उन्माद भएको बताए ।

‘नेका वरिष्ठ नेता रामचन्द्र पौडेलको गिरफ्तारी र प्रहरी हस्तक्षेप स्थानीय प्रशासनको एकल निर्णय र परिस्थितिजन्य प्रतिक्रिया हुनै सक्दैन, होइन’, थापाले सामाजिक सञ्जालमार्फत भनेका छन्, ‘यो नियोजित हो, राजनीतिक प्रतिशोध हो, शक्ति उन्माद हो।’

उनका अनुसार पौडेल गिरफ्तारीको घटनाले सरकारको चरित्रलाई उदाङ्गो बनाएको छ । प्रधानमन्त्री केपी शर्मा ओलीलाई ‘मेन्सन’ गर्दै उनले पौडेल गिरफ्तारीको घटना निकै महँगो पर्ने पनि चेतावनी दिएका छन् ।

उनले भनेका छन्, ‘यसले यो सरकारको चरित्रलाई उदाङ्गो बनाएको छ, प्रधानमन्त्री केपी शर्मा ओली जी यो तपाईँका लागि निकै महँगो पर्नेछ।’

नेता पौडेललाई तनहुँ प्रहरीले स्थानीय प्रशासनले लगाएको निषेधाज्ञा तोडेको आरोपमा नियन्त्रणमा लिएको छ । उनी पुल उद्घाटनको लागि तनहुँ गएका थिए । तर, पुल उद्घाटनको विषयमा कांग्रेस र नेकपाबीच विवाद बढेपछि स्थानीय प्रशासनले निषेधाज्ञा लागु गरेको थियो ।