हामी सबैकाे संसारन्यूज

काठमाडौं । नेपाली कांग्रेसका सभापति शेरबहादुर देउवाले पदाधिकारी र पूर्वपदाधिकारीको बैठक बोलाएका छन् । तनहुँ घटनाबाट आक्रोशित देउवाले पदाधिकारीहरुको आकस्मिक बैठक बोलाएका हुन् ।

जनाइएअनुसार बैठक शुक्रबार दिउँसो २ बजेदेखि सभापति निवास बुलानीलकण्ठमा बस्दैछ । जनाइएअनुसार बैठकमा तनहुँ घटनाकै विषयमा छलफल हुनेछ ।

गत बुधबार तनहुँमा पुल उद्घाटन गर्न गएका पार्टी वरिष्ठ नेता रामचन्द्र पौडेललाई निषेधाज्ञा उल्लंघनकाे आराेपमा प्रहरीले पक्राउ गरेको थियो । उनलाई तीन घण्टासम्म प्रहरीले नियन्त्रणमा राखेको थियो ।

पौडेलविरुद्व प्रहरीले गरेको त्यस्तो व्यवहार गरेसँगै सभापति देउवाले विज्ञप्ती नै सार्वजनिक गरेर सरकारविरुद्व आक्रोश पोखेका थिए । उनले सरकार अधिनायकवादतर्फ उन्मुख हुँदै गएको भन्दै देशव्यापी प्रतिरोध गर्ने चेतावनी दिएका थिए ।

जसपश्चात कांग्रेसले देशैभरि विरोध प्रदर्शन पनि गरेको थियो । देउवाले पछिल्लो उक्त घटनाबारे समिक्षा गर्न र आगामी रणनीतिबारे छलफल गर्न पदाधिकारीहरूकाे बैठक बोलाएको बताइएको छ ।