हामी सबैकाे संसारन्यूज

काठमाडौँ । असार २०८३ का लागि वाणिज्य बैंकहरूले सार्वजनिक गरेको निक्षेपको अधिकतम ब्याजदरमा सामान्य मात्र परिवर्तन देखिएको छ। नेपाल राष्ट्र बैंकको तथ्यांकअनुसार २० वटा वाणिज्य बैंकमध्ये अधिकांशले जेठ महिनाकै ब्याजदरलाई निरन्तरता दिएका छन् भने केही बैंकले व्यक्तिगत तथा संस्थागत निक्षेपको ब्याजदर घटाएका छन्।

तथ्यांकअनुसार व्यक्तिगत निक्षेपतर्फ औसत अधिकतम ब्याजदर ४.३४३ प्रतिशतबाट घटेर ४.२६५५ प्रतिशत मा पुगेको छ। यस्तै संस्थागत निक्षेपतर्फ औसत ब्याजदर ३.२०४ प्रतिशतबाट घटेर ३.१८ प्रतिशत कायम भएको छ।

सबैभन्दा बढी व्यक्तिगत निक्षेपको ब्याजदर राष्ट्रिय वाणिज्य बैंकले ४.७५ प्रतिशत कायम राखेको छ। यस्तै एनएमबी बैंक ले आफ्नो व्यक्तिगत निक्षेपको अधिकतम ब्याजदर ४.८० प्रतिशतबाट ४.७५ प्रतिशतमा झारेको छ।

यस अवधिमा लक्ष्मी सनराइज बैंक र एनआईसी एशिया बैंक ले व्यक्तिगत निक्षेपको ब्याजदरमा सबैभन्दा धेरै ०.५० प्रतिशत बिन्दुले कटौती गरेका छन्। हिमालयन बैंकले व्यक्तिगत तथा संस्थागत दुवै निक्षेपमा ०.२५ प्रतिशत बिन्दुले कमी गरेको छ भने प्राइम कमर्सियल बैंकले व्यक्तिगततर्फ ०.१५ प्रतिशत बिन्दुले ब्याजदर घटाएको देखिन्छ।

यता स्ट्यान्डर्ड चार्टर्ड बैंक ले व्यक्तिगत निक्षेपको ब्याजदर ०.०५ प्रतिशत बिन्दुले घटाए पनि संस्थागत निक्षेपको ब्याजदर २.४८ प्रतिशतबाट बढाएर २.७५ प्रतिशत पु¥याएको छ, जुन यस तालिकामा संस्थागततर्फ देखिएको उल्लेखनीय वृद्धि हो।

नबिल बैंक, प्रभु बैंक, नेपाल इन्भेष्टमेन्ट मेगा बैंक, सानिमा बैंक, ग्लोबल आइएमई बैंक, माछापुच्छ्रे बैंक, नेपाल बैंक, नेपाल एसबीआई बैंक, कृषि विकास बैंक, सिटिजन्स बैंक इन्टरनेसनल, एभरेष्ट बैंक तथा सिद्धार्थ बैंकलगायत अधिकांश बैंकले भने जेठ महिनाकै ब्याजदरलाई यथावत् राखेका छन्।

ब्याजदरमा ठूलो उतारचढाव नदेखिएकाले बैंकिङ क्षेत्रमा तरलता अवस्था अपेक्षाकृत सहज रहेको र निक्षेप आकर्षित गर्न आक्रामक प्रतिस्पर्धा हाल नरहेको संकेतका रूपमा यसलाई हेरिएको छ। वित्तीय बजारका जानकारहरूका अनुसार आगामी महिनामा कर्जा माग र तरलताको अवस्थाअनुसार ब्याजदरमा थप समायोजन हुन सक्ने सम्भावना रहेको छ।