हामी सबैकाे संसारन्यूज

‎काठमाडौँ । पूर्वीय दर्शनको प्राण, मानव चेतनाको ऊर्ध्वगमनको वैज्ञानिक पद्धति एवं प्राचीन सनातन स्वास्थ्य विज्ञान (योगविधा)लाई विश्व मानचित्रमा देदीप्यमान बनाउँदै आएको ‘मारुत अभियान’ काठमाडौँका शीर्ष नेतृत्वलाई अन्तर्राष्ट्रिय स्तरको गरिमामय पुरस्कारद्वारा विभूषित गरिएको छ।

काठमाडौँको मुटुमा रहेको होटल रमदा, धुम्बराहीको भव्य सभाहलमा सम्पन्न भएको त्रिदेशीय महाकुम्भ ‘इन्टरनेसनल आयुष कन्क्लेभ ४.०’को सुअवसरमा मारुत अभियानका संस्थापक अध्यक्ष अनिल कुमार यादव (योगगुरु त्यागी अनिल मारुत)लाई ‘आयुष चिकित्सा, मनोशारीरिक सन्तुलन एवं जनस्वास्थ्य चेतना’ को क्षेत्रमा असाधारण योगदान पुर्‍याएको भन्दै ‘आयुष राईजिङ अवार्ड’ समर्पण गरिएको छ।
‎
‎भारतको ‘सिभिक’, संयुक्त अरब इमिरेट्सको ‘लेजेन्ड्स वर्ल्ड रेकर्ड्स’ र ‘नेपाल चेम्बर अफ कमर्स’ (NCC) को त्रिकोणात्मक संयुक्त आयोजनामा सम्पन्न उक्त अन्तर्राष्ट्रिय वैज्ञानिक सम्मेलनमा मारुत अभियानका सचिव तथा वरिष्ठ योग प्रमुख प्रशिक्षक दीपक सिंह थापा (आनन्द प्रकाश) लाई समेत उच्च प्राविधिक विधा र विशिष्ट सहभागिताका लागि ‘डेलिगेट एप्रिसिएसन सर्टिफिकेट’ द्वारा सम्मानित गरिएको छ।
‎
‎काठमाडौँको धुम्बराहीस्थित होटल रमदामा आयोजित यस ऐतिहासिक कन्क्लेभमा विश्वभरिबाट वैकल्पिक तथा रैथाने चिकित्सा पद्धतिमा अहोरात्र खटिएका वैज्ञानिक, चिकित्सक र शोधकर्ताहरूको बृहत् सहभागिता रहेको थियो।

सम्मेलनमा आयुर्वेद, योग, नेचुरोप्याथी (प्राकृतिक चिकित्सा), होमियोप्याथी र युनानी जस्ता आयुष विधा अन्तर्गत मानव स्वास्थ्य र सेलुलर लेभलको जैविक ऊर्जा प्रणाली (Bio-energetic systems) मा क्रान्तिकारी योगदान पुर्‍याउने संसारभरिका जम्मा २१० जना प्रखर महानुभावहरूलाई विशेष सम्मान गरिएको थियो। सोही वैश्विक मञ्चमा नेपालको तर्फबाट मारुत अभियानले प्राप्त गरेको अवार्ड र सम्मानले नेपालको प्राङ्गारिक एवं यौगिक चिकित्सा विधिको साखलाई विश्वभरि अझ उकालेको छ।
‎
‎संस्कार न्युज डटकमलाई प्राप्त प्रामाणिक विवरण अनुसार, साधकद्वय त्यागी अनिल मारुत र आनन्द प्रकाश विगत विक्रम संवत २०७१ सालदेखि अनवरत रूपमा योग, ध्यान, र अध्यात्म विज्ञानको प्रवर्धनमा क्रियाशील छन् । विगत १२ वर्षदेखि उहाँहरूले संयुक्त अरब इमिरेट्स (UAE) का विभिन्न प्रान्तहरू, भारतका विभिन्न आध्यात्मिक केन्द्रहरू तथा नेपालका कुना-कुनामा पुगेर लाखौँ विद्यार्थी, अभिभावक, शिक्षक र जनसमुदायको ‘मस्तिष्क-तरङ्ग’ (Brainwaves) लाई सकारात्मक ऊर्जामा रूपान्तरण गर्ने वैज्ञानिक प्रशिक्षण दिँदै आएका छन्।
‎
‎जटिल आधुनिक जीवनशैलीका कारण मानिसको न्यूरो-बायोलोजिकल प्रणालीमा आएको ह्रासलाई कम गर्न उहाँहरूले प्रतिपादन गर्नुभएको जीवन जीउने कलाले मानव अस्तित्वलाई एउटा ‘आनन्द उत्सव’ मा परिणत गर्न उत्प्रेरकको भूमिका खेलेको छ। विशेष गरी विद्यालयका शिक्षकहरूलाई केन्द्रित गर्दै उहाँहरूले ‘पराशिक्षा’ (Higher/Spiritual Knowledge) को वैज्ञानिक पद्धति सिकाउनुहुन्छ। यो शिक्षण विधिले शिक्षकहरूलाई केवल किताबी ज्ञान (अपरा विद्या) मा मात्र सीमित नराखी, बालबालिकाको अन्तर्निहित मानसिक सम्भावना (Neuroplasticity) लाई प्रस्फुटन गराउने कला प्रदान गर्दछ।
‎
‎मारुत अभियानले सामाजिक उत्तरदायित्व वहन गर्दै नेपालका विभिन्न सामाजिक, शैक्षिक तथा आध्यात्मिक संघसंस्थाहरूलाई पूर्ण रूपमा ‘निःशुल्क’ योग प्रशिक्षण सेवा प्रदान गरेर एउटा परोपकारी कीर्तिमान कायम गरेको छ। संस्थाभित्र उहाँहरू दुई अभियन्ताको कार्यविभाजन निकै वैज्ञानिक र प्रभावकारी देखिन्छ ।
‎
‎त्यागी अनिल मारुतले विशेष गरी विद्यालय तहका नेपाली बालबालिका (विद्यार्थी) र शिक्षकहरूको मानसिक रूपान्तरण, संज्ञानात्मक क्षमता (Cognitive Function) अभिवृद्धि र संवेगात्मक सन्तुलनका लागि जमीनी स्तरमै पुगेर प्रत्यक्ष प्रशिक्षण दिन्छन भने आनन्द प्रकाशले आधुनिक सूचना प्रविधिको उच्चतम प्रयोग गर्दै भर्चुअल माध्यमबाट विश्वभरिका विदेशी पाहुना तथा अन्तर्राष्ट्रिय साधकहरूलाई नेपाली योग र हिमवत्खण्डको ध्यान पद्धतिको गहिरो ज्ञान प्रवाह गर्छन ।
‎
‎मारुत अभियानकै अथक र सक्रिय प्रयासमा ‘विश्व शान्ति तथा अध्यात्म विज्ञान समाज’ द्वारा सञ्चालित ‘विश्व शान्ति बालसंस्कार कुञ्ज’ को डिजिटल एवं भौतिक मञ्चबाट नेपालको इतिहासमै एउटा ठुलो आध्यात्मिक क्रान्ति सफल भएको छ। उक्त मञ्चबाट हालसम्म अनुमानित १०० जना कलिला नेपाली बालबालिकाहरू ‘सर्टिफाइड इन्टरनेसनल योग टिचर’ (Certified International Yoga Teacher) बन्न सफल भइसकेका छन्।
‎
‎अन्तर्राष्ट्रिय मापदण्ड अनुसार प्रमाणित भएका यी बाल योग गुरुहरूले नेपालका विभिन्न स्थानमा आफैँ ‘योग शिविर’ हरू कुशलतापूर्वक सञ्चालन गरेर आफ्नो कौशल्या, आत्मबल र आध्यात्मिक प्रखरता (Spiritual Intelligence) प्रस्तुत गरिसकेका छन्। बालबालिकाको उमेरमै डीएनए (DNA) र सेलुलर तहमा संस्कार र चेतनाको बीजारोपण गर्ने यो अभियान विश्वकै लागि एक अनुकरणीय नमुना बनेको छ।
‎
‎होटल रमदा धुम्बराहीको भव्य मञ्चमा टोखाको पवित्र भूमिबाट अङ्कुरित मारुत अभियानले पाएको यो विजय वास्तवमा नेपालको मौलिक प्राकृतिक चिकित्सा र दर्शनको विजय हो। योग केवल शारीरिक कसरत नभएर क्वान्टम फिजिक्स (Quantum Physics) र अध्यात्म विज्ञानको त्यो मिलनविन्दु हो, जसले ब्रह्माण्डीय ऊर्जालाई मानव शरीरको चक्रहरूसँग जोड्दछ।