हामी सबैकाे संसारन्यूज

१९ मंसिर, काठमाडौँ । नेपाली ध्वजाबाहक नेपाल वायु सेवा निगमको जहाज उडानलाई हङकङले पुनः दुई साताको लागि प्रतिबन्ध लगाएको छ ।

सोमबार उडान भरेको निगमको जहाजबाट हङकङ अवतरण भएका ५ यात्रुमा कोरोना परीक्षण पोजेटिभ देखिएपछि हङकङ सिभिल एभिएसनले पुनः प्रतिबन्ध लगाइएको हो । हङकङले चौथोपटक निगमलाई प्रतिबन्ध लगाएको हो । अब २ पौषसम्म निगमको जहाज हङकङ उडान गर्न पाउनेछैन ।

निजी प्रयोगशालाको रिपोर्टमाथि प्रश्न उठेपछि नेवानिले आफ्नो उडानबाट हङकङ जाने यात्रुलाई सरकारी प्रयोगशालामा जँचाएको रिपोर्ट अनिवार्य गरेको थियो । तर सरकारी प्रयोगशालामार्फत कोभिड–१९ परीक्षण गरेका यात्रुहरुहरुमा हङकङमा गरिएको परीक्षणमा रिपोर्ट पोजेटिभ आएको हो ।

सुरुको उडानमा चार जनामा संक्रमण पुष्टि भएपछि हङकङले निगमलाई अक्टोबर ४ देखि १७ सम्म उडानमा प्रतिबन्ध लगाएको थियो । त्यसपछिको अर्को उडानमा नौ जनामा कोरोना पुष्टि भएपछि पुन अक्टोबर २२ नोभेम्बर ४ सम्म प्रतिबन्ध लगायो ।

त्यसको एक सातापछि भएको अर्को उडानमा १४ जना संक्रमित पुष्टि भएपछि नेवानीलाई हङकङले नोभेम्बर १२ देखि २५ तारिखसम्म उडानमा प्रतिबन्ध लगाएको थियो ।