Sansar News
पुस ८, काठमाडौं । नेपाल कम्युनिष्ट पार्टी (नेकपा)को पुष्पकमल दाहाल ‘प्रचण्ड’ तथा माधवकुमार नेपाल पक्षीय संसदीय दलको बैठकले पार्टी अध्यक्षसमेत रहेका प्रचण्डलाई संसदीय दलको नेताको रुपमा चयन गरेको छ । बानेश्वरस्थित संसद भवनमा बसेको बैठकले प्रचण्डलाई चयन गरेको बैठकमा सहभागी एक सांसदले जानकारी दिए ।
यसअघि एकिकृत दलको नेताको रुपमा प्रधानमन्त्री केपी शर्मा ओली थिए । तर, मंगलबार बसेको प्रचण्ड–नेपाल पक्षीय केन्द्रीय समितिको बैठकले ओलीलाई पार्टीबाट हटाउने निर्णय गरेको थियो ।
मंगलबारको केन्द्रीय समिति बैठकले ओलीलाई हटाउँदै नयाँ नेता चयन गर्न संसदीय दलको बैठक बोलाउने निर्णय गरेको थियो । सोही निर्णयअनुसार आज बैठक बसेको हो ।
संसदीय दलको बैठकमा सयभन्दा बढि सांसदहरुको उपस्थिति रहेको उक्त पक्षले दाबी गरेको छ ।
वि.सं.२०७७ पुस ८ बुधवार १४:४४ मा प्रकाशित
