Sansar News
पुस १४, काठमाडौं । प्रतिबन्धित नेत्रविक्रम चन्द विप्लव नेतृत्वको नेकपा सहितका ४ पार्टीले प्रधानमन्त्री केपी शर्मा ओलीले संसद विघटन गर्ने निर्णय विदेशी शक्तिको आडमा गरेको दाबी गरेका छन् । मंगलबार चार पार्टीले संयुक्त विज्ञप्ती जारी गर्दै यस्तो दाबी गरेका हुन् ।
नेकपाका महासचिव नेत्र विक्रम चन्द ‘विप्लव’, क्रान्तिकारी माओवादीका महासचिव मोहन वैद्य ‘किरण’, नेकपाका अध्यक्ष ऋषिराम कट्टेल र समाजवादी कम्युनिष्ट पार्टीका संयोजक आहुतिद्धारा संयुक्त हस्ताक्षरित विज्ञप्तीमा ओलीको एकल निर्णयबाट संसद विघटन नभएको बताइएको हो ।
‘दलाल तथा प्रतिक्रियावादी सत्ता, व्यवस्था र सरकारमा आएको गम्भीर संकटलाई फासीवादी तरिकाले हल गर्ने दुष्प्रयासस्वरुप तथा वैदैशिक शक्तिको आड भरोस र इसारामा केपी सरकारले संसद विघटन गरेको हो भन्ने हाम्रो ठम्माई रहेको छ’, संयुक्त विज्ञप्तीमा भनिएको छ ।
विज्ञप्तीमा मार्फत ४ दलले संसद विघटन र सत्तारुढ नेकपा फुट्नु संसदीय व्यवस्था असफलता भएको पनि दाबी गरेका छन् । उनीहरले संयुक्त विज्ञप्तीमार्फत देशको अग्रगामी निकासका लागि आफुँहरु पहलकदमी लिन पनि तयार रहेको उद्घोष गरेका छन् ।
यस्तो छ ४ पार्टीले संयुक्त रुपमा सार्वजनिक गरेको विज्ञप्ती
वि.सं.२०७७ पुस १४ मंगलवार १२:४३ मा प्रकाशित
