Sansar News
१६ पुस, काठमाडौं । प्रदेश १ का मुख्यमन्त्री शेरधन राईलाई नेकपा (प्रचण्ड-माधव समूह) ले संसदीय दलको नेताबाट हटाएको छ । उनको स्थानमा भीम आचार्यलाई संसदीय दलको नेतामा अघि सारिएको छ ।
प्रदेश १ का बहुमत सांसदको बिहीबार बसेको बैठकले राईलाई संसदीय दलको नेताबाट हटाएकाे हो । नेकपामा पछिल्लो समय देखिएको विवादका कारण त्यसको असर प्रदेशसभाहरुमा पनि देखा पर्न थालेको छ । मुख्यमन्त्री राईविरुद्ध अविश्वासको प्रस्ताव दर्ता गरेको प्रचण्ड-माधव समूहले यसअघि बागमती प्रदेशका संसदीय दलका नेता मुख्यमन्त्री डाेरमणी पाैडेलका विरुद्धपनि अविश्वासको प्रस्ताव दर्ता गराएकाे थियाे ।
प्रचण्ड-माधव समूहले आचार्यलाई संसदीय दलको नेता चयन गर्दै मुख्यमन्त्रीमा प्रस्ताव गरेको छ । प्रदेश १ मा नेकपाका ६७ सांसदमध्ये ३७ जनाले राईविरुद्ध अविश्वासको प्रस्तावमा हस्ताक्षर गरेका थिए ।
वि.सं.२०७७ पुस १६ बिहीवार १३:५२ मा प्रकाशित
