हामी सबैकाे संसारन्यूज

१६ पुस, काठमाडौं। नेपाल विद्युत प्राधिकरणले अनौपचारिक रुपमा चार वर्षपछि लोडसेडिङको निरन्तरता दिन लागेको छ । त्यसको सुरुवात स्वरुप प्राधिकरणले लोड व्यवस्थापनको नाममा ललितपुरका विभिन्न स्थानमा विद्युत कटौतीका लागि सूचना प्रकाशन गर्न थालेको छ ।

प्राधिकरणले काठमाडौं बानेश्वरको लोड व्यवस्थापनका लागि भन्दै ललितपुरका चापागाउँ, हरिसिद्धि र खुमलटारस्थित रेडियो नेपाल क्षेत्रको लाईन १ देखि ३ घण्टासम्म कटौती गर्नेगरी सूचना निकालेको छ । प्रकाशित गरिएको सुचना अनुसार चापागाउँमा बिहान ९ बजेदेखि १० बजेसम्म, हरिसिद्धिमा १२ बजे देखि २ बजेसम्म र खुमलटारस्थित रेडियो नेपालमा १२ बजेदेखि ३ बजेसम्म विद्युत कटौती हुने छ ।

यो अवस्था लोडसेडिङको सुरुवातको रुपमा नभइ लोड व्यवस्थापनका लागि गरिएको विद्युत प्राधिकरणका प्रमुख हितेन्द्रदेव शाक्य बताउछन् । उनी भन्छन्,‘ बानेश्वर सवस्टेसनको एउटा लाइन पाटनहुँदै हरिसिद्धिसम्म गएको छ। त्यसैले उक्त लाइन व्यवस्थापन गर्न हरिसिद्धिसम्म लाइन काट्नु परेको हो । ’ तर प्राधिकरणकै केहि कर्मचारीहरुभने कुलमान घिसिङ बाहिरिएसँगै व्यवस्थापन भताभुङ हुदै गएको र यो लोडसेडिङको सुरुवाती चरण रहेको बताउछन् ।

काठमाडौंको लोडलाइ हेर्ने हो भने गत वर्षको भन्दा कम छ । काठमाडौंमा गत वर्ष साढे चार सय मेगावाट हाराहारी विद्युतको माग थियो भने हाल ३७० देखि ८० मेगावाटसम्म मात्रै विद्युत माग रहेको छ।