Sansar News
२० पुष, काठमाडौँ । नेपाल कम्युनिस्ट पार्टी (नेकपा) प्रचण्ड–माधव पक्षका अध्यक्ष पुष्पकमल दाहाल ‘प्रचण्ड’ पत्नी सीता दाहालको थप उपचारका लागि भारतको मुम्बई प्रस्थान गरेका छन् ।
नेपाल एयरलाइन्सको बिहान ११ बजेको उडानबाट दाहाललाई मुम्बई लगिएको हो । अध्यक्ष प्रचण्ड सीतासँगै र छोरी गंगा दाहाल पनि मुम्बई गएका छन् ।
सीता दाहाल लामो समयदेखि पार्किन्सन जस्तो देखिने एक जटिल प्रकारको रोगले पीडित छिन् । भैंसेपाटीस्थित मेडिसीटी अस्पतालमा उपचार चलिरहे पनि सुधार नदेखिएपछि थप उपचारका लागि भारतको मुम्बई लगिएको प्रचण्डको निजी सचिवालयले जनाएको छ ।
सीताको उपचार न्यूरोजेन ब्रेन एण्ड स्पाइन इन्सटिच्युटमा हुनेछ भने उनलाई सो अस्पतालका डाइरेक्टर तथा कन्सलट्यान्ट न्यूरो सर्जन डा. आलोक शर्माको टोलीले उपचार गर्ने पनि सचिवालयले जनाएको छ ।
यसअघि सीताको उपचार अमेरिकास्थित जोन हप्किन्स अस्पतालमा पनि भएको थियो ।
वि.सं.२०७७ पुस २० सोमवार १२:०७ मा प्रकाशित
