हामी सबैकाे संसारन्यूज

२३ पुस, काठमाडौं । भारतीय चर्चित अभिनेता अभिताभ बच्चनको आवाज सुनेर हैरान भएका एक व्यक्तिले दिल्लीको उच्च अदालतमा मुद्दा दायर गरेका छन् ।

विश्वव्यापी कोरोना महामारीका कारण त्यसको रोकथामका लागि सर्वसाधारणमा सावधानी अपनाउन भनेर गरिएको अपिलमा अभिताभ वच्चनको आवाज पटक पटक सुनेर हैरान भएका एक व्यक्तिले दिल्लीको उच्च अदालतमा मुद्दा दायर गरेको भारतीय संचार माध्यमले लेखेका छन् ।

भारतमा पहिलोपटक सन् २०२० को जनवरीमा कोरोनाको केस देखिएपछि त्यहाँको सरकारले देशव्यापी लकडाउन सुरु गर्यो । लकडाउनका साथै सर्वसाधारणमा शिघ्र जनचेतना फैलाउन सकियोस् भन्ने उद्धेश्यले सरकारले त्यहाँका टेलिकमहरुलाई प्रयोग गरेर मोबाइलको कलर ट्युनमा अभिताभ बच्चनको आवाजमा कोरोनाबाट बच्ने उपायसहितको ट्युन बनायो ।

उता कोरोना महामारीको डर यता हरेक पटक फोनमा एउटै आवाज अनि एउटै कुरा दोहोर्याएर पटक–पटक सुन्नु पर्दा हैरान भएका एक व्यक्तिले उक्त कलर ट्युन हटाउन माग गर्दै मुद्दा दायर गरेका हुन् । अक्टोबर २० देखि निरन्तर फोनको घन्टीमा अभिताभ बच्चनको आवाज सुनिएपछि उनले यसो गर्न बाध्य भएको बताइएको छ ।

एक व्यक्तिले अभिताभ बच्चनसँग सोसियल मिडियामा समेत यसबारेमा प्रश्न गर्दा बच्चनले यसको जवाफमा आफूले देश, प्रान्त र समाजको लागि जे गरे पनि त्यो निःशुल्क गर्ने गरेको बताउँदै भनेका थिए ‘यसले तपाईलाई कस्ट दिएको छ भने क्षमा पार्थी छु । तर, यो मेरो हातको कुरा छैन ।’

यसरी नै फोनको घन्टीमा पटक–पटक बच्चनको आवाज सुनेर हैरान भएका अन्य सर्वसाधारणले पनि ती व्यक्तिले हालेको मुद्दामा खुसी जनाएको बताइएको छ ।