Sansar News
माघ १३, काठमाडौं । नेपाली कांग्रेसको केन्द्रीय कार्यसमितिकाे बैठक बस्ने भएको छ । पार्टी केन्द्रीय कार्यालय सानेपामा बैठक बस्न लागेको हो ।
कांग्रेस केन्द्रीय सदस्य गोपालमान श्रेष्ठका अनुसार आजको बैठकमा प्रतिनिधि सभा विघटनविरुद्व घोषणा भएका आन्दोलनका कार्यक्रम र प्रदेश सभामा दर्ता अविश्वासका प्रस्तावबारे छलफल हुने कार्यक्रम रहेको छ । उनका अनुसार प्रदेशसभामा दर्ता अविश्वासको प्रस्तावबारे आजको बैठकले थप निर्णय लिनसक्ने छ ।
प्रदेश १ र बागमती प्रदेशका मुख्यमन्त्रीविरुद्व विभाजित नेकपाको प्रचण्ड–नेपाल पक्षले अविश्वासको प्रस्ताव दर्ता गरेको छ । दुवै स्थानमा कांग्रेस निर्णायक अवस्थामा छ ।
यसअघि कांग्रेसले प्रदेश १ र बागमती प्रदेशका केन्द्रीय सदस्यहरुसँग छलफल गरेको थियो । तर, हालसम्म पनि कांग्रेसले कसलाई सहयोग गर्ने निर्णय गरेको छैन् ।
साथै कांग्रेसले प्रतिनिधि सभा विघटन असंवैधानिक भएको ठहर गर्दै चरणबद्ध रुपमा आन्दोलन गरिरहेको छ । कांग्रेसले जिल्ला, निर्वाचन क्षेत्र, पालिका र वडा स्तरसम्म प्रदर्शन गरिसकेको छ । जसबारे पनि आजको बैठकले थप निर्णय लिन सक्ने बुझिएको छ ।
वि.सं.२०७७ माघ १३ मंगलवार १३:०९ मा प्रकाशित
