हामी सबैकाे संसारन्यूज

माघ १६, काठमाडौं । प्रधानमन्त्री केपी शर्मा ओली पक्षीय नेकपाका नेता सुवास नेम्वाङले निर्वाचन आयोगले पार्टीको आधिकारिताबारे टुंगो लगाईसकेको बताएका छन् । निर्वाचन आयोगले ओली पक्षलाई नै आधिकारिक मानेको उनकाे भनाई छ ।

नेम्वाङका अनुसार निर्वाचन आयोगका शुक्रबार आयोगमा भएको छलफल दल दर्ता निर्वाचनको तयारीसम्बन्धमा थियो । ‘आधिकारिताको विषय टुंगी सकेको छ, आज त्यसमा छलफल भएन’, पत्रकारसँगको कुराकानीमा नेम्वाङले भने, ‘दल दर्ता र निर्वाचनको तयारीको सम्बन्धमा मात्रै आज छलफल भयो, हामीलाई त्यहि विषयमा छलफलका लागि भनेरै बोलाइएको थियो ।’

उनका अनुसार निर्वाचन आयोगले माघ ११ मा नै पार्टीको आधिकारिकताबारे निर्णय गरिसकेको थियो । कतिपयलाई निर्णयमा भ्रम पनि परेको उनले सुनाए ।

आगामी वैशाखभित्रै निर्वाचन सम्पन्न गर्ने गरि तयारी गर्न आयोगलाई आफुँहरुले सुझाब दिएको उनको भनाई छ । निर्वाचन आयोगले पनि समय पर्याप्त भएको जानकारी दिएको उनले बताए ।

‘निर्वाचन आयोगका प्रमुख आयुक्तलगायतलाई एक मिनेट पनि यसमा ढिलाई नगरियोस् हामीसँग पर्याप्त समय छ भनेका छौं’, नेम्वाङले भने, ‘उहाँहरुको भनाईअनुसार ८४ दिन जति भए पुग्नेमा अहिले हामीसँग ९० दिन छ, हामी कुनै पनि कारणले अलिकति पनि ढिलाई गर्नुहुन्न, वैशाख १७ र २७ गते निर्वाचन हुन्छ ।’

निर्वाचन आयोगसँग छलफल गर्दा हामी यहि निष्कर्षमा पुगेका छौं । दल दर्तासम्बन्धी प्रक्रियामा अब हामी अगाडि बढ्छौं ।