हामी सबैकाे संसारन्यूज

काठमाडौं । अभिनेता तथा निर्देशक दीपकराज गिरीले अभिनेत्री तथा निर्देशक दिपाश्री निरौलाको ब्रेन ट्युमरको सफल शल्यक्रिया भएको जानकारी दिएका छन्।

गिरीले सामाजिक सञ्जाल फेसबुकमार्फत यस साता आफ्नो टोलीका लागि निकै चुनौतीपूर्ण र कठिन समय रहेको उल्लेख गर्दै सुटिङकै क्रममा दिपाश्रीलाई ब्रेन ट्युमर भएको पत्ता लागेको बताएका हुन्।

उनका अनुसार रोग पहिचान भएपछि तत्काल शल्यक्रिया गर्नुपर्ने अवस्था सिर्जना भएको थियो। उपचारका लागि भारत जान विभिन्न पक्षबाट सुझाव आए पनि अन्ततः नेपालमै वरिष्ठ न्युरोसर्जन डा. बसन्त पन्तको नेतृत्वमा शल्यक्रिया गर्ने निर्णय गरिएको उनले बताएका छन्।

गिरीका अनुसार भगवानको कृपाले शल्यक्रिया सफलतापूर्वक सम्पन्न भएको छ। हाल दिपाश्री आईसीयूबाट जनरल वार्डमा सारिएको र स्वास्थ्यलाभ गरिरहेकी छन्।

उनले उपचारमा संलग्न सम्पूर्ण स्वास्थ्यकर्मीप्रति आभार व्यक्त गर्दै दिपाश्रीको शीघ्र स्वास्थ्यलाभको कामना गर्ने सबै दर्शक, शुभचिन्तक तथा शुभेच्छुकप्रति धन्यवाद व्यक्त गरेका छन्।

दीपकराजले आफ्नो फेसबुक पोस्टको अन्त्यमा “जय पशुपतिनाथ” लेख्दै सबैको प्रार्थना र साथप्रति कृतज्ञता व्यक्त गरेका छन्।

गिरीले स्टाटस राख्नुपूर्व याे जानकारी गाेप्य थियाे ।