Sansar News
माघ १९, काठमाडौं । राष्ट्रिय सभाका अध्यक्ष गणेशप्रसाद तिमल्सिनाले सभामुख अग्निप्रसाद सापकोटाले संवैधानिक परिषदसम्बन्धी पत्रलाई फिर्ता पठाएकोप्रति आपत्ति जनाएका छन् । सोमबार पत्रकार सम्मेलन गर्दै उनले आपत्ति जनाएका हुन् ।
उनले सभामुखको निर्णयले राष्ट्रिय सभाको भूमिका र गरिमामाथि प्रहार भएको पनि बताए । तिमल्सिनाले संसदीय सुनुवाई समितिमा प्रतिनिधिसभा र राष्ट्रिय सभाको हैसियत समान भएको भन्दै सभामुखले मात्रै एकल निर्णय गर्न नसक्ने बताएका छन् ।
‘पत्रमा उल्लिखित ‘संघीय संसद् तथा सो अन्तर्गतका समितिको व्यवस्थापन, सञ्चालनसमेतको व्यवस्था गर्ने अधिकार प्रतिनिधि सभाका सभामुखमा निहित भएको’ भन्ने व्यहोराले दुई सदनात्मक संघीय व्यवस्थापिकासम्बन्धी संवैधानिक व्यवस्था, स्थित अभ्यास माथिल्लो सदन (राष्ट्रिय सभा)को भूमिका र गरिमामा प्रहार भएको छ’, उनले भनेका छन् ।
आइतबार सभामुख अग्निप्रसाद सापकोटाले संवैधानिक परिषदबाट पठाइएको सिफारिस पत्रलाई सक्कलै फिर्ता पठाईदिएका थिए ।
सम्बन्धित समाचार
विवादस्पद नियुक्ती सिफारिस : सुनुवाई हुन नसक्ने भन्दै सभामुखले फिर्ता पठाए पत्र
वि.सं.२०७७ माघ १९ सोमवार १५:३४ मा प्रकाशित
