Sansar News
माघ २०, काठमाडौं । प्रधानमन्त्री केपी शर्मा ओलीले बोलाएको संवैधानिक परिषदको बैठक प्रधानन्यायाधीश चोलेन्द्र शमशेर जबराको असहमतिका कारण स्थगित भएको छ । ओलीले बुधबार साँझ बोलाएको बैठक जबराको असहमतीसँगै अनिश्चितकालका लागि स्थगित भएको हो ।
प्रधानमन्त्री ओलीले गत मंसिर ३० मा संवैधानिक परिषदसम्बन्धी अध्यादेश ल्याउँदै संवैधानिक निकायहरुमा नियुक्तीको सिफारिस गरेका थिए । जसलाई उनले प्रतिनिधि सभा विघटनको दिन गत पुस ५ सार्वजनिक गरेका थिए ।
जुन निर्णय संसदीय सुनुवाईका लागि संसद सचिवालयमा पठाइएको थियो । तर, सभामुख अग्निप्रसाद सापकोटाले सिफारिस असंवैधानिक भन्दै जस्ताको तस्तै फिर्ता गरिदिए ।
सभामुखले सिफारिस पत्र फिर्ता गरिदिएपछि ओलीले अर्को निर्णय लिन बैठक डाकेका हुन् । तर, प्रधानन्यायाधीश जबराको असहयोगका कारण उक्त बैठक असफल भएको छ ।
जनाइएअनुसार संवैधानिक परिषदसम्बन्धी अध्यादेश र संसद विघटनसम्बन्धी मुद्दामाथि बहस चलिरहेको बेला प्रधानन्यायाधीशले नैतिकताका आधारमा बैठकमा उपस्थित हुन अस्वीकार गरेका हुन् । हाल सर्वोच्चको संवैधानिक इजलासमा संसद विघटनसम्बन्धी मुद्दामाथि बहस छ । जुन इजलासको नेतृत्व स्वंय प्रधानन्यायाधीशले गरिरहेका छन् ।
वि.सं.२०७७ माघ २० मंगलवार १६:४४ मा प्रकाशित
