Sansar News
माघ २२, काठमाडौं । विभाजित नेकपाको प्रचण्ड–नेपाल समूहले आज देशव्यापी आमहड्ताल गरेको छ । आमहड्तालको प्रभाव राजधानी काठमाडौंसहित देशैभरि परेको छ ।
काठमाडौंमा छिटफुट रुपमा मोटरसाईक र केही निजी सवारीका साधन सञ्चालनमा भए पनि सार्वजनिक सवारी साधन भने ठप्प छ । बन्दको प्रभाव बजार व्यवसायमा पनि परेको छ । केहि खाद्यान्न तथा अत्यावश्यकीय बाहेक सबै जसो व्यवसाय बन्द छन् ।
आमहड्तालको आव्हान गरेको प्रचण्ड–नेपाल समूहका शीर्ष नेताहरु पनि सडकमा ओर्लिएका छन् । समूहका अध्यक्षद्वय पुष्पकमल दाहाल ‘प्रचण्ड’ र माधवकुमार नेपाल बिहान सडकमा निस्किएका थिए ।
बन्द सफल बनाउन प्रचण्ड पुल्चोक पुगेर आन्दोलनमा सहभागी भएका थिए भने अर्का अध्यक्ष नेपाल कोटेश्वर क्षेत्रमा देखिएका थिए ।
प्रचण्ड बा १७ च ३०७१ नम्बरको ल्याण्ड कु्रजर गाडी चढेर पुल्चोकसम्म पुगेका थिए भने नेपाल बा ५२ प ५८१४ होण्डा स्कुटर चढेर बन्दको निरिक्षण गरेका थिए । दुवै नेताहरु केही समय सडक प्रदर्शनमा सहभागी भएर निवास तर्फ फर्किएका छन् ।
वि.सं.२०७७ माघ २२ बिहीवार १२:२४ मा प्रकाशित
