हामी सबैकाे संसारन्यूज

काठमाडौं, २६ माघ । ऐतिहासिक सम्पदा धरहराको पुनर्निमाणको काम करिब अन्तिम चरणमा पुगेको छ । राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशिल ज्ञवालीका अनुसार अब एक तलाको मात्रै ढलानको काम बाँकी छ ।

उनका अनुसार २१ औं तलासम्मको ढलानको काम सम्पन्न भईसकेको छ । ज्ञवालीले जनाएअनुसार २२ औं तलाको ढलानपछि धरहराको शिरानमा पुरानै गजुर राखिनेछ ।

धरहराको पुनर्निर्माण २०७५ असोज २० देखि सुरु भएको थियो । यसको पुनर्निर्माणको जिम्मा रमन कन्सट्रक्सनले अनुमानित ३ अर्ब ४८ करोड रुपैयाँ लागतमा लिएको थियो ।

नयाँ धरहरा देख्दा पुरानै जस्तो हुने

भीमसेन थापाले वि.सं. १८८२ मा निर्माण गरेको ११ तले धरहरा वि.सं. १९९० मा आएको भूकम्पमा क्षतिग्रस्त बन्न पुगेको थियो । त्यससमय धरहरा ११ तलाबाट ९ तलामा सीमित भएको थियो ।

त्यसपश्चात २०७२ वैशाख १२ मा आएको विनाशकारी भूकम्पले धरहरा पूर्णं क्षतिग्रस्त बन्न पुग्यो । पूर्णं क्षति भएपश्चात सरकारले पुर्ननिर्माणको काम अगाडि बढाएको हो ।

यसपटक बन्ने नयाँ धरहरा भित्रबाट २२ तला र बाहिरबाट देख्दा ११ तलाको हुनेछ । धरहरा भिमसेन थापाले बनाएजस्तै देखिनेछ । साथै नयाँ बन्ने धरहरा भूकम्पप्रतिरोधात्मक पनि हुनेछ । धरहरामा पहिलो जस्तै भ¥याङसँगै लिफ्टको व्यवस्था पनि हुनेछ ।