हामी सबैकाे संसारन्यूज

३१ चैत, काठमाडौं । दोलखामा जिप दुर्घटना हुँदा ४ जनाको मृत्यु हुनुका साथै १७ जना घाईते भएका छन् ।

सिन्धुपाल्चोकको तातोपानी हुँदै दोलखाको विगु गाउँपालिका तर्फ जाँदै गरेको प्रदेश–३–०१–०२३च–७५८० नम्बरको जिप सोमबार राति ११ बजेतिर विगु गाउँपालिका -४ सिंगटीमा दुर्घटना हुँदा दोलखाको विगु गाउँपालिकाका ४५ वर्षीया अजिता खत्री, ५२ वर्षीया राधा खड्का, ३५ वर्षीय विनोद केसी र २४ वर्षीया चण्डिका थापाको दुर्घटनामा परेर मृत्यु भएको जिल्ला प्रहरी कार्यालय दोलखाले जनाएको छ । उनीहरुमध्ये तीनजनाको घटनास्थलमै र एकजनाको उपचारका क्रममा मृत्यु भएको हो ।

जिल्ला प्रहरी कार्यालय दोलखाका प्रहरी निरीक्षक अन्जन कोइरालाका अनुसार अगाडि ५ जना बस्न मिल्ने उक्त जिपको पछिल्लो भागमा त्यतिधेरै यात्रु राखेका कारण दुर्घटना भएको प्रारम्भिक अनुसन्धानमा खुलेको छ ।

‘रातिको बेला उकालो बाटो धेरै यात्रु राखेका कारण जिप अनकन्ट्रोल भएर दुर्घटना भएको अनुसन्धानमा देखिएको छ ।’ प्रहरी निरीक्षक कोइरालाले संसारन्युजसँग भने । दुर्घटनामा घाईते भएकाहरुमा १४ जनालाई धुलिखेल अस्पताल पठाइसकिएको छ । साथै एकजनालाई विएण्डबी अस्पताल र १ जनालाई ट्रमा सेन्टर पठाइएको छ भने एकजनाको दोलखामै उपचार भइरहेको छ ।

कोइरालाले पहिलो चरणको उद्धार कार्य सकिएको र थप अनुसन्धानमा लागिरहेको बताए ।