हामी सबैकाे संसारन्यूज

६ जेठ, काठमाडौं । स्वास्थ्य तथा जनसंख्या मन्त्रालयले उपत्यकामा भेरोसिल खोप लगाएर हाल बाहिरी जिल्लामा रहेकालाई जिल्ला स्वास्थ्य कार्यालयमा नाम टिपाउन अनुरोध गरेको छ ।

उपत्यकामा दोस्रोपटक भेरोसिल खोप अभियान चलिरहेको अवस्थामा पहिलो खोप लिएर जिल्ला बाहिर गएकाहरुले स्थानीयतहका स्वास्थ्य संयोजकहरुमार्फत् जिल्ला स्वास्थ्य कार्यालयमा लागत टिपाउन मन्त्रालयले अनुरोध गरेको हो ।

‘यसरी भेरोसिलको दोस्रो मात्रा खोप लगाउनेहरुको लागत तयार भएपछि यथाशीघ्र प्रदेशको समन्वयमा खोप लगाउने मिति र स्थान तोकिने भएकाले यस्ता व्यक्तिलाई सवारी साधन पास बनाएर आवतजावतको व्यवस्था गरिदिनुहुन सम्बन्धीत प्रशासन कार्यालयहरुमा अनुरोध छ ।’ मन्त्रालयले भनेको छ ।

हाल संक्रमण बढिरहेको र विभिन्न जिल्लामा निशेधाज्ञा जारी रहेकाले आवत–जावतमा संवेदनशील हुनुपर्ने भन्दै मन्त्रालयले यस्तो सूचना जारी गरेको हो ।